Braziliianyń Rio-de-Janeiro qalasynda ótken Olimpiada oiyndary qazaq eli úshin oljaly boldy. Bul týraly Elbasy Nursultan Nazarbaev HHHI jazǵy Olimpiada jeńimpazdary men júldergerlerine qurmet kórsetý saltanatynda málimdedi, dep habarlaidy "Ult aqparat" Baq.kz portalyna silteme jasap.
«Barsha Qazaqstan halqyn Rio-de-Janeiroda ótken Olimpiadadaǵy jarqyn jeńispen quttyqtaimyn. Bizdiń sańlaq sportshylarymyz tórt jylda bir keletin dúbirli dodada el senimin abyroimen qorǵady. Bizdiń ánuranymyzdyń «altyn kún aspany» dep bastalýynyń ózindik simvoldyq máni bar. Braziliia aspanynda kók bairaǵymyz úsh márte barlyq memleketterden biik kóterilip, ánuranymyz úsh ret shyrqaldy», - dedi Memleket basshysy.
Sonymen qatar, Elbasy sportshylardyń 17 medalge ie bolǵandyǵyn erekshe atap ótti.
«Táýelsizdik tarihynyń altynshy Olimpiadasynda qazaq eli 17 medalge ie boldy. Bul jahandyq jarys bizdiń tarihymyzdaǵy eń oljalysy boldy. Bul sportshylardyń Táýelsizdigimizdiń 25 jyldyq mereili belesine qosqan tolasty tabysy dep bilemiz. Bizdiń sportymyz álemdik básekege qabiletti ekenin kórsettik», - dep tolyqtyrdy N.Nazarbaev.
Sondai-aq, QR Prezidenti Rio Olimpiadasyndaǵy jetistikter jasóspirimderdiń kóptep sportqa kelýine sebep bolatyndyǵyn jetkizdi.
«Rio-de-Janeirodaǵy jarqyn jeńister jastardyń jigerin janyp, jańa biikterge jetelep, kóptegen jasóspirimderdiń sportqa yntasyn arttyrady. Óskeleń urpaqtyń patriottyq sezimin kúsheitip, milliondaǵan jastyń sportqa qulshynysyn arttyrdy dep bilemin. Asqaq armandarǵa birge umtylǵan, tilegi ortaq, maqsaty bir, halqymyzdyń yntymaǵy men birligi odan ári nyǵaia tússin», - dep túiindedi N.Nazarbaev.
Aita keteiik, tórtjyldyqtyń basty dodasynda elimizdiń namysyn 26 sport túrinen 104 sportshy qorǵady.
Rio-de-Janeiro qalasynda ótken Olimpiada oiyndarynda Qazaqstan sportshylary 3 altyn, 5 kúmis, 9 qola medal enshiledi. Jalpy komandalyq esepte qazaq eli 22-shi oryndy ielenip, medal sany jaǵynan rekord jańartty.
Buǵan deiin elimiz Atlantada - 11, Sidneide - 7, Afinyda - 8, Beijińde - 13, al London Olimpiadasynda 13 medal enshilegen bolatyn. Al osy joly ulttyq qurama 17 júldeni jeńip aldy.
Rio-Olimpiadasynda sportshylarymyz Nijat Rahymov, Daniiar Eleýsinov jáne Dmitrii Balandin altyn alsa, Jazira Japparqul, Eldos Smetov, Vasilii Levit, Ádilbek Niiazymbetov pen Giýzel Maniýrova kúmis medalǵa qol jetkizdi. Qola júlde alǵandardyń qatarynda Galbadrah Otgontsetseg, Farhad Harki, Karina Goricheva, Aleksandr Zaichikov, Olga Rypakova, Elmira Syzdyqova, Ekaterina Larionova, Ivan Dychko, Dariǵa Shákimova bar.
.jpeg)