Tuńǵysh Prezident - Elbasy Nursultan Nazarbaev Qazaqstan halqyna úndeý joldady. «Ult» portaly úndeýdiń tolyq mátinin jariialaidy.
***
Qymbatty otandastar!
Qadirli dostar!
Ózderińiz biletindei, koronavirýs infektsiiasynyń qaterli pandemiiasy álemniń kóptegen elderin, sonyń ishinde Qazaqstandy da sharpydy. Milliondaǵan adam osy aýyr dertpen syrqattandy, ol meni de ainalyp ótken joq. Birqatar shet memleketter men úkimetter basshylarynyń, kórnekti saiasatkerler men qoǵam qairatkerleriniń shynaiy janashyrlyǵyn tanytyp, maǵan moraldyq qoldaý kórsetkeni kóńilimdi tebirentti. Barshasy qaltqysyz niettestigin jetkizip, sergektik tilep, tezirek saýyǵyp ketýime tilektestigin joldady, sol úshin bárine zor rizashylyǵymdy bildiremin.
Olardyń qatarynda Resei Prezidenti Vladimir Pýtin, Qytai Halyq Respýblikasynyń Tóraǵasy Si Tszinpin, Qyrǵyzstan Prezidenti Sooronbai Jeenbekov, Ózbekstan Prezidenti Shavkat Mirzieev, Tájikstan Prezidenti Emomali Rahmon, Túrikmenstan Prezidenti Gýrbangýly Berdymýhamedov, Túrkiia Prezidenti Redjep Taiip Erdoǵan, Amerika Qurama Shtattarynyń Memlekettik hatshysy Maikl Pompeo, Birikken Arab Ámirlikteriniń Prezidenti Halifa Zaid Ál Nahaian, Úndistannyń Premer-ministri Narendra Modi, Japoniia Premer-ministri Sindzo Abe, Iordaniia Koroli II Abdalla ben ál-Hýsein, Ázerbaijan Prezidenti Ilham Áliev, Armeniia Prezidenti Armen Sarkisian, Ýkraina Prezidenti Vladimir Zelenskii, Koreia Respýblikasynyń Prezidenti Mýn Chje In, Pákstan Prezidenti Arif Alvi, Izrail Prezidenti Reýven Rivlin, Serbiia Prezidenti Aleksandr Výchich, Horvatiia Prezidenti Zoran Milanovich jáne t.b. bar. Bárin túgel atap shyǵý múmkin emes, biraq men olardyń barlyǵynyń joldaǵan hat-habarymen tanystym. Qymbatty dostar, sizderdiń shyn kóńilden shyqqan tilekterińiz, ystyq yqylastaryńyz maǵan kúsh berip, ómirge qulshynys-qýatymdy arttyrdy. Barshańyzǵa basymdy iip, zor densaýlyq pen tabys tileimin.
Men elimizdiń kóptegen óndiris ujymdarynan, eńbek ardagerlerinen, áskeri qyzmetshilerden, stýdentter men oqýshylardan – óz qoldaýy men tilektestikterin jetkizip, maǵan myqty densaýlyq tilep, tolyq saýyǵyp ketýime niettestik bildirgen kóp qazaqstandyqtardan hattar men jedelhattar, sondai-aq áleýmettik jeli arqyly joldanǵan hat-habarlar aldym.
Maǵan shynaiy janashyrlyǵy men qoldaýyn ǵylymi qoǵamdastyq pen shyǵarmashylyq ziialy qaýymnyń ókilderi de bildirgenin rizashylyqpen aita ketkim keledi. Olardyń arasynda Serik Qirabaev pen Áliia Beisenova, Bibigúl Tólegenova, Tóregeldi Sharmanov, Myrzatai Joldasbekov, Sultan Orazalin, Ǵarifolla Esim, Nesipbek Aituly, Jandarbek Málibekov, Talǵat Temenov jáne basqa da Qazaqstanǵa keńinen tanymal qairatkerler boldy.
Meniń atyma Olga Rypakova, Dmitrii Balandin, Ilia Ilin, Áliia Iýsýpova, Zarina Dias siiaqty belgili sportshylarymyz izgi tilekterin bildirdi. Barshańyzǵa kóp rahmet aitamyn! Men bárińizdi de bilemin. Sizder jáne basqa da jastar – táýelsizdik perzentterisizder. Densaýlyq pen baqyt tileimin!
Dárigerlerdiń kúsh-jigeri jáne olardyń talaptaryn múltiksiz oryndaýdyń, sondai-aq barshanyń qoldaýy men jyly sózderiniń arqasynda men syrqattan saýyǵyp shyqtym, qazir ózimdi jaqsy sezinemin, tolyqqandy jumysqa kiriskeli otyrmyn. Halqymmen birge bul syrqattyń búkil aýyrtpashylyǵyn sezindim, qazir emdelip jatqandardyń bárine tózim men qajyr-qairat jáne tezirek saýyǵyp ketýlerin tileimin.
Biz ótkerip jatqan kúrdeli kezeń – búkil adamzattyń basyna túsken syn-synaq. Syrqatpen kúrestiń eń aldyńǵy shebinde júrgen dárigerler adamdardy aman alyp qalý úshin barlyq kúshin jumsaýda. Bul rette meditsina qyzmetkerleriniń eńbegine baǵa jetpeidi – muny qazirgi ýaqyt aiqyn kórsetip otyr. Bolashaqta da otandyq densaýlyq saqtaý salasyna basa kóńil aýdaryp, ony damytýǵa qajetti qarjylyq jáne materialdyq resýrstar bólý kerek. Osy oraily sátte elimizdiń meditsina qyzmetkerlerine erekshe rizashylyǵymdy bildiremin.
Esterińizde bolar, táýelsizdiktiń bastapqy jyldary meniń sheshimimmen arnaýly Ulttyq qor qurylyp, altyn-valiýta rezervi jasaldy. Bul bizge álemdik eki birdei daǵdarysty jeńip shyǵýǵa septigin tigizdi jáne sol qarajat qazir Úkimetke pandemiiaǵa qarsy aýqymdy jumys pen turmysy tómenderge qoldaý kórsetý barysynda kómegin tigizýde. Eger aldaǵy ýaqytta ony aqylmen, únemdep paidalana bilsek, ózge syn-qaterlerdi de tiimdi eńsere alamyz. Qazaqstannyń basqa elder aldynda qaryzy eń tómen memlekettiń biri ekeni de bizdiń artyqshylyǵymyz.
Elimizdiń Prezidenti men Úkimeti qalyptasqan jaǵdaidy túzetý úshin qajetti barlyq sharany qabyldaýda. Alaida kóp nárse ózimizge bailanysty. Dárigerler biz úshin qoldarynan kelgenniń bárin jasap jatyr. Alaida bul aýrýdy juqtyrýdan saqtaný kóbinese ár adamnyń ózine bailanysty. Tózimdi bolý kerek, ásirese, jastarǵa. Qajetti gigiena talaptaryn oryndap, tezirek vaktsina paida bolaryna úmittene otyryp, aýrý juqtyrýdan barynsha uzaǵyraq ýaqyt saý bolýǵa tyrysqan jón. Tártip saqtap, óz densaýlyǵymyzdy, týǵan-týystar men jaqyndardyń amandyǵyn oilaýymyz qajet, dárigerlerge sený kerek.
Halqymyz basqa túsken qiyndyqty óziniń qairat-jigeri, uiymshyldyǵy, bolashaqqa degen umtylysy arqyly búkil halyqaralyq qoǵamdastyqpen birge laiyqty túrde eńserip, aman-esen shyǵaryna senimdimin. Biz taǵy da jeńimpaz bolamyz. Elimizdiń jaqsy kúnderi alda. Biz birgemiz! Biz jeńemiz! Bizdiń uranymyz osy.
Barlyq otandastarymyzǵa myqty densaýlyq pen igilik, elimizge baq-bereke tileimin!
