Nursultan Nazarbaev Irannyń syrtqy ister ministri Mohammad Djavad Zarifpen jáne Resei strategiialyq zertteýler institýtynyń direktory Mihail Fradkovpen kezdesti. Bul týraly "Ult aqparat" Elbasynyń baspasóz qyzmetine silteme jasap habarlaidy.
Kezdesý barysynda Qazaqstannyń Tuńǵysh Prezidenti «Astana klýbynyń» otyrysyna qatysqany úshin qonaqqa alǵysyn bildirdi.
«Astana klýbynda» sóilegen sózińizdi muqiiat tyńdadym. Barlyq máselelerge jan-jaqty toqtaldyńyz. Osy 27 jyl ishinde biz qarym-qatynasty nyǵaitý úshin jumys jasadyq. Men sizdiń elińizde alty ret boldym. Qazaqstan Iranǵa kóptegen máseleler boiynsha únemi qoldaý kórsetip keledi, - dedi Elbasy.
Óz kezeginde Mohammad Djavad Zarif Iran basshylyǵy men halqy Qazaqstannyń Tuńǵysh Prezidentiniń aimaqtaǵy qaýipsizdikti nyǵaitýǵa qosqan úlesin joǵary baǵalaitynyn atap ótti.
Iran Syrtqy ister ministri basshysy Nursultan Nazarbaevqa Siriiadaǵy qaqtyǵysty sheshý úshin Qazaqstan astanasynda kelissózder uiymdastyrǵany úshin alǵys bildirdi.
Sondai-aq, Elbasy Resei strategiialyq zertteýler institýtynyń direktory Mihail Fradkovpen kezdesti.
Kezdesý barysynda Nursultan Nazarbaev Resei strategiialyq zertteýler institýty men QR Tuńǵysh Prezidenti – Elbasy Qorynyń janyndaǵy Álemdik ekonomika jáne saiasat institýty arasynda yntymaqtastyq ornatýdyń mańyzdylyǵyn atap ótti.
Sonymen qatar, taraptar álemdik sarapshylardyń qatysýymen pikirsaiys alańdaryn uiymdastyrýǵa úlken suranys bar ekenine nazar aýdardy. Osy turǵyda qazirgi jahandyq syn-qaterlerdi ótý úshin jańa sheshimderdi izdeýde «Astana klýby» alańynyń erekshe mańyzy men rólin atap ótti.
