Jergilikti máslihattar ózderine berilgen quqyqtardy paidalanýy qajet. Bul týraly «Nur Otan» partiiasy Saiasi keńesiniń keńeitilgen otyrysynda QR Tuńǵysh Prezidenti Nursultan Nazarbaev aitty, dep habarlaidy QazAqparat.
«Búgingi kúni máslihattar óńirlerdiń damýyna shynaiy yqpal etetin tetikterge ie. Zańnamaǵa sáikes olar biýdjetti, jergilikti damý baǵdarlamalaryn bekitip, biýdjet qarajatynyń jumsalýyn baqylai alady. Ákimderge senimsizdik tanytý quqyǵyna da ie bolyp otyr. Biz bul quqyqtardy qai jerde paidalandyq? Qazir ákim men fraktsiia tóraǵasy bir adam bolǵan kezde tártip bolmaityndyǵy aitylýda. Bólý qajet. Men qazaqtyń jaǵdaiyn bilemin ǵoi. Eki qoshqardyń basy bir qazanǵa syimaidy. Sodan taǵy kelispeýshilikter týyndaidy. Al eger ony jasamaiyq desek, ákimder nege jumys istemeisizder? Partiia óz aldyna, meniń jumysym myna jaqta óz aldyna. Eger ondai bolatyn bolsa ber basqa adamǵa, partiianyń tóraǵasy emespin dep shyq», - dedi Elbasy.
Osy rette QR Tuńǵysh Prezidenti barlyq deńgeidegi ákimderge partiia jumysyna apta, ai saiyn kóńil bólip, bedelin arttyryp otyrý qajettigin eskertti.
«Senderdi sailaǵan solar. Eger shyndyǵyn aitar bolsaq, fraktsiialardyń kópshiligi búginde tiimsiz jumys isteidi. Biýdjet qabyldanbastan buryn máslihatta qaralýy kerek. Fraktsiia jergilikti biýdjetti maquldaýy tiis. Sodan keiin baryp qabyldaýy qajet. Almatyda qolǵa alyp edik, durys boldy», - dedi Nursultan Nazarbaev.
