«Nur Otan» partiiasy oblystyq filialy tóraǵasynyń birinshi orynbasary Ǵaliasqar Sarybaev jumys saparymen Aqsý aýdanynda bolyp qaitty. Issapar barysynda birqatar áleýmettik nysandy aralap, Aqsý qant zaýytynyń búgingi tirshiligimen tanysty. Sonymen birge aýdan halqymen júzdesip, Elbasy Nursultan Nazarbaevtyń «Bolashaqqa baǵdar: rýhani jańǵyrý» atty maqalasyn túsindirdi. Budan soń jergilikti turǵyndarmen jeke qoǵamdyq qabyldaý ótkizip, ótinish-tilekterine qulaq asty.
Qant zaýytyndaǵy tirshilik
Óńirde júrip jatqan jumystarmen Aqsý aýdanynyń ákimi Ádilbek Dalbaǵaev, aýdandyq máslihat hatshysy Beibit Súleimenov jáne atalmysh partiianyń aýdandyq filialy tóraǵasynyń birinshi orynbasary Kúláihan Dáýletbekova tanystyrdy. Ǵaliasqar Tólendiuly aldymen «Aqsý qant» jaýapkershiligi shekteýli seriktestigine bardy. Kásiporynǵa kirebere tirshilik tamyryna qaita qan júgire bastaǵany birden ańǵaryldy. Olai deýge negiz bar. Sebebi, jumysshylar bilek sybana iske kirisip, ózderine júktelgen mindetti minsiz atqarýda. Eskirgen qurylǵylar qaita jóndeýden ótkizilip, zaýyttyń merziminen keshiktirilimei iske qosylýyna daiyndyq qyzý júrip jatty. Bas injener Vladimir Iýshkov kásiporyndy aralatyp, atqarylyp jatqan jumystardy kórsetti. Mamyr aiynan bastalǵan jóndeý jumystary kúzge deiin jalǵaspaq. Bul jerde qazir júzden asa adam eńbekke tartylǵan. Jaz ortasynda olardyń sany taǵy ósip, qazan aiynda jeti júzge jýyqtamaq. Aita keteiik, jóndeý júrgizý úshin biyl 8 mlrd. teńge qarajat qarastyrylypty, al kelesi jyly 5 mlrd. teńge bólinbek.
Balabaqsha boi kóterýde
Kelesi kezekte «nurotandyqtar» memlekettik-jekemenshik áriptestik negizinde jańadan boi kóterip jatqan balabaqshaǵa keldi. Jansúgirov aýylynda sáýir aiynan beri qurylysy júrip jatqan atalmysh nysan qarashada paidalanýǵa berilmek. Ǵimaratty «Týǵan jerge týyńdy tik» atty aktsiiasy aiasynda «Daniiar» sharýa qojalyǵynyń iesi, aýyl týmasy Talǵat Jýanyshev degen azamat óz qarajaty esebinen salýda. Aldaǵy ýaqytta bul jerde úsh pen alty jas aralyǵyndaǵy búldirshinder tárbielenip, jiyrmaǵa jýyq adam jumyspen qamtamasyz etiletin bolady. Kásipkerdiń aitýynsha, elý oryndy jańa baqshada balaǵa qajetti jaǵdaidyń bári qarastyrylmaq. Sondai-aq, biyl aýdanda taǵy elý oryndy balabaqsha ashý kózdelgen. Buǵan qosa, Qarasý orta mektebindegi shaǵyn ortalyq janynan 13 oryndy, Q. Muqashev atyndaǵy negizgi orta mektebi janynan 13 oryndy qosymsha toptar ashý josparlanǵan. Mamandardyń aitýynsha, mundai jaqsy úrdister aldaǵy jyldarda da jalǵaspaq.
Kedergisiz keleshek
Oblystyq filial tóraǵasynyń birinshi orynbasary aýdandyq ortalyq aýrýhana men Molyqbai atyndaǵy Mádeniet úiine de bas suǵyp, «Kedergisiz keleshek» jobasy aiasynda ǵimarattardyń kireberis tusynda ornatylǵan pandýstarǵa nazar aýdardy. Bul jerdegi jumys jaiyn atalmysh aýrýhananyń basshysy Asqar Baltabaev aityp berdi. Bas dárigerdiń sózine júginsek, aýrýhana búginde barlyq talapqa sai qyzmet atqaryp jatqan kórinedi. Qajetti qural-jabdyqtarmen de tolyq qamtamasyz etilipti. Týý kórsetkishi de jaman emes. Máselen, biyldyń bes aiynda tórt júzge jýyq sábi dúniege kelipti. Desek te, bul sala boiynsha qazir akýsher-ginekolog, hirýrg siiaqty dáriger mamandar jetispeidi. Soǵan qaramastan, osy baǵyt boiynsha aýqymdy jumystar júrgizilip, byltyr birneshe jas maman qyzmetke qabyldanǵan. Olarǵa aýdan tarapynan barynsha jaǵdai jasalyp, baspanamen de qamtamasyz etilipti. Biyl taǵy alty dáriger kelmek. Osydan qyryq jyl buryn salynǵan úsh qabatty ǵimarat aýlasy búginde abattandyrý men kúrdeli jóndeý jumystaryn talap etýde.
Elbasy maqalasy túsindirildi
Budan soń aýdandyq ákimdikte jiyn ótti. Oǵan aýdandyq máslihat depýtattary, aýyldyq okrýg ákimderi, óńirdegi qoǵamdyq jáne úkimettik emes uiym ókilderi jáne jastar qatysty. Jiynda Ǵaliasqar Tólendiuly Elbasy Nursultan Nazarbaevtyń «Bolashaqqa baǵdar: rýhani jańǵyrý» atty maqalasynda kórsetilgen baǵyttardy jeke-jeke talqylap, mán-maǵynasyn túsindirdi. Osy jónindegi oiyn ortaǵa salyp, táýelsiz memleketimizdiń jiyrma bes jyl ishinde qol jetkizgen tyń tabystary men atalǵan maqalanyń táýelsiz memleketimizdiń rýhani jańǵyrýynyń bastaýy ekendigin sóz etti. Osyǵan orai el ekonomikasyn damytýdaǵy jańa ózgeristerge, ǵylym men bilim jetistikterine, sana-sezimdi qalyptastyryp, mádenietti órkendetýge nazar aýdaryp, qazaq tiliniń mánin arttyrýdaǵy latyn álipbiine kóshýdiń mańyzdylyǵyna toqtaldy. Jastarmen de etene jaqyn jumys istep, olardy otansúigishtikke baýlýǵa, jańa tehnologiialardy meńgertýge, sybailas jemqorlyqtyń aldyn alyp, «Ekspo –2017» kórmesin tabysty ótkizýge atsalysý qajettigin atap ótti. Osylaisha, órkenietti elderdiń qataryna kirigý baǵytynda bir jaǵadan bas, bir jeńnen qol shyǵara birlese eńbek etýge úndep, jinalǵandar tarapynan qoiylǵan suraqtarǵa jaýap qaitardy. Kelesi kezekte minberge kóterilgen aýdandyq ardagerler keńesiniń tóraǵasy, aýdannyń Qurmetti azamaty Amankeldi Aitbaev, E. Siqymbaev atyndaǵy orta mektep direktory, oblystyq máslihat depýtaty Rahat Ibraimova, aýdandyq Mádeniet úiiniń direktory, aýdandyq máslihat depýtaty Ashat Dosmuhambetov maqalaǵa bailanysty oilaryn ortaǵa tastap, kópshilikpen bólisti.
Qoǵamdyq qabyldaý
Kelesi kezekte atalmysh partiianyń aýdandyq filialy ǵimaratynda qoǵamdyq qabyldaý ótip, azamattardyń ótinish-tilekteri tyńdaldy. Máselen, Aqsýbai Áliasqaruly Eginsý aýyly jastarynyń bir mezgil bas qosyp, boi sergitetin oryndarynyń joqtyǵyna bailanysty Mádeniet úii ǵimaratynyń qajet ekenin aitsa, Qapal aýylynyń turǵyny Serik Qojataev qazirgi tańda jas mamandardyń aýylǵa kóptep kelýine jáne olardyń sol jerde turaqtap, jumys isteýi úshin baspana máselesiniń kedergi keltirip otyrǵanyn alǵa tartty. B. Syrttanov aýylynan kelgen Mahabbat Nurmuhamatqyzy da oiyn jetkizip, aýyl joldaryn jasaýǵa qarajat bólinse degen igi tilegin aitty. Issapar sońynda Ǵaliasqar Tólendiuly aýdanda atqarylyp jatqan jumystarǵa oń kózqaras tanytyp, baǵa berdi.
Aigúl Baibosynova
