Qazaqstan Respýblikasynyń Memlekettik hatshysy Gúlshara Ábdiqalyqovanyń tóraǵalyǵymen Qazaqstan Respýblikasynyń Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiia otyrysy ótti, dep habarlaidy "Ult aqparat" Aqordaǵa silteme jasap.
Basqosýda halyqty jumyspen qamtý salasyndaǵy zańdylyqty saqtaýǵa, sondai-aq infraqurylymdyq damýdyń «Nurly jol» memlekettik baǵdarlamasyn júzege asyrýǵa bólingen qarajatty paidalaný tiimdiligine qatysty qabyldanyp jatqan sharalar talqylandy.
Otyrysta Bas prokýratýra, Memlekettik qyzmet isteri jáne sybailas jemqorlyqqa qarsy is-qimyl agenttigi, Investitsiia jáne damý, Eńbek jáne halyqty áleýmettik qorǵaý ministrlikteri basshylarynyń baiandamalary tyńdaldy.
Jiyndy ashqan Gúlshara Ábdiqalyqova Memleket basshysy Nursultan Nazarbaevtyń biylǵy 7 qarashada ótken Qaýipsizdik keńesiniń otyrysynda sybailas jemqorlyqpen belsendi kúres jalǵasa beretinin, halyq qarajattyń qaida jáne qandai maqsatqa jumsalǵanyn bilýge tiis ekenin aitqanyn eske saldy.
Halyqty jumyspen qamtamasyz etý máselesi – memlekettiń áleýmettik saiasatynyń negizi. Jumyspen qamtý isine qoldaý kórsetý maqsatymen qabyldanǵan keshendi baǵdarlamalar eńbek naryǵynda turaqtylyqty saqtaýǵa jáne daǵdarys kezeńderiniń keleńsiz saldaryn jumsartýǵa septigin tigizdi.
Baǵdarlamalardy qarjylandyrýǵa aitarlyqtai memleket qarajaty bólinýde. Sonymen birge, 2016 jyldan beri antikorrýptsiialyq qyzmet 194 qylmysty tirkep, 32 adam sottaldy. Zań buzý jaittary negizinen jumysqa turý faktileriniń jalǵandyǵymen, biýdjet qarajaty men berilgen shaǵyn nesielerdiń maqsatyna sai jumsalmaýymen bailanysty bolyp otyr.
G.Ábdiqalyqova sybailas jemqorlyq qaterlerin azaitatyn tiimdi tetikterdi engizý qajettigin aitty.
Sondai-aq, quqyq qorǵaý jáne baqylaý organdarynyń ókilderi Komissiia múshelerine qarjylandyrý kólemi 3 trillion teńgeden asqan «Nurly jol» infraqurylymdyq damý memlekettik baǵdarlamasyn iske asyrýǵa bailanysty kóptegen zań buzýshylyqtar anyqtalǵany jóninde málimdedi. Baǵdarlama júzege asyryla bastaǵaly sotqa deiingi 120 tergeý amaly júrgizilip, 48 adam sottalǵan. Memlekettik aýdit organdary jalpy quny 48 milliard teńge bolatyn zań buzý jaittaryn anyqtaǵan.
Memlekettik hatshy sybailas jemqorlyqty azaitý úshin jergilikti jerlerde árbir investitsiialyq jobanyń júzege asyrylýyn qamtamasyz etip, elektrondyq resýrstar múmkindikterin keńinen qoldaný mańyzdy ekenin atap ótti.
Talqylaý qorytyndysy boiynsha Komissiia ókiletti memlekettik organdarǵa anyqtalǵan zań buzý jaittaryn joiý úshin naqty sharalar qabyldaý jóninde tapsyrma berdi.
