«Nurly jol» temir jol vokzalyn salý barysynda 50 mln teńgeniń jumystary sapasyz oryndalyp, qural-jabdyqtar ornatylmaǵan. Bul týraly búgin Esep komitetiniń múshesi Konstantin Plotnikov aitty, dep habarlaidy QazAqparat tilshisi.
«EKSPO-2017» kórmesiniń ashylýyna orai qyzmet kórsete bastaýy tiis bolǵan Astanadaǵy jańa temir jol vokzalynyń bastapqy quny 210,3 mlrd teńge bolatyn. Qurylys barysynda ol 243,6 mlrd teńgege deiin artty. Paidalanýǵa qurylys-montajdaý jumysynyń, qural-jabdyqtar men qural-saimannyń tek 36,3 paiyzy ǵana paidalanýǵa berilgen. 50,7 mln teńgeniń jumystary sapasyn oryndalyp, qural-jabdyqtar ornatylmaǵan», - dedi ol.
Onyń dereginshe, temir jol vokzalynyń múgedekterge arnalǵan aqparattyq-dabyl qurylǵysyna 11,1 mln teńge bólingenimen ol qurylǵylar jumys istemeidi. Qysqy zal qurylysyna arnalǵan 22,1 mln teńge maqsatyna sai jumsalmaǵandyqtan tiimsiz paidalanylǵan.
«Suiytylǵan aýa jáne azot óndirisin ornatý jónindegi jobany júzege asyrýǵa bólingenimen paidalanylmaǵan biýdjet qarajatyn biýdjetke qaitarý tetiginiń bolmaýy saldarynan 2015 jyldan beri 18 mlrd teńgeden astam qarajat baqylaý esep shotynda jatyr», - dedi K.Plotnikov.
Aita keterligi, búgin Respýblikalyq biýdjettiń atqarylýyn baqylaý jónindegi Esep komitetiniń otyrysy ótip, onda QR Ulttyq ekonomika ministrliginiń 2014-2018 jyldarǵa arnalǵan strategiialyq josparynyń jáne Qazaqstanda kórsetiletin qyzmetter salasyn damytý jóninjegi 2020 jylǵa deiingi baǵdarlamanyń iske asyrylý tiimdiligine júrgizilgen memlekettik aýdittiń qorytyndysy shyǵarylǵan bolatyn.
