«Qazaqstan turǵyn úi-qurylys jinaq bankiniń» oblystyq bólimshelerinde 9 qarashadan 8 jeltoqsanǵa deiin «Báiterek Development» jelisi boiynsha «Nurly jol» baǵdarlamasy aiasynda turǵyn úi alýǵa ótinish qabyldaý bastaldy. Bul týraly aqparattyq ortalyqta ótken baspasóz málihatynda «Qazaqstan turǵyn úi-qurylys jinaq banki» AQ basqarma tóraǵasynyń orynbasary Qairat Altynbekov málim etti.
Qazirgi tańda elimizde «Nurly jol» infraqurylymdyq damytýdyń memlekettik baǵdarlamasy aiasynda turǵyn úi qurylystary salynyp jatyr. Bul biregei baǵdarlamanyń maqsaty – azamattardyń basymdyq berilgen sanattary men qalyń jurtshylyq úshin qoljetimdi turǵyn úi qurylysynyń turaqty ósý qarqynyn qamtamasyz etý. Qurylysty qarjylandyrý kózine bailanysty osy baǵdarlama aiasyndaǵy turǵyn úilerdi satý eki negizgi baǵyt – jergilikti atqarý organdary jáne «Báiterek» Holdinginiń enshilesi «Báiterek Development» arqyly júzege asyrylady.
– Shyǵys óńirinde 18 mlrd. teńge qarajatyn jinaqtap otyrǵan 63 myń bank salymshysy bar. Bul - biz úshin úlken jaýapkershilik. Salymshylarymyz ózderiniń esepshottaryn baspana máselesin sheshý úshin ashatyndyqtan, olarǵa arnalǵan tiimdi usynystar aýqymyn keńeitýge barynsha tyrysamyz. Tiimdi sharttar men baspana sapasyn aldyńǵy orynǵa qoiyp, «Nurly jol» baǵdarlamasy boiynsha 30 paiyzdyq bastapqy jarnamen nesie beremiz, - deidi «Qazaqstan turǵyn úi-qurylys jinaq banki» basqarma tóraǵasynyń orynbasary Qairat Altynbekov.
Atalmysh bank salymshylary bul baǵdarlama boiynsha jylyna 5 paiyzdyq qoljetimdi nesie arqyly qalaǵan páterin ala alady. Toǵyz qabatty úi Óskemendegi Q.Sátpaev pen K.Marks dańǵyldarynyń qiylysyndaǵy «Aiymjan» kóppáterli turǵyn úi kesheninde ornalasqan. «Kýrmysh Treid» jaýapkershiligi shekteýli seriktestigi salǵan bul záýlim úi sharshy metriniń quny 152 663 teńgeden bolatyn 2, 3 bólmeli 159 páterden turady.
Óńirimizde bul memlekettik baǵdarlamany júzege asyrý aiasynda Shyǵys Qazaqstan oblysy ákimdigi men «Qazaqstan turǵyn úi-qurylys jinaq banki» AQ arasynda áriptestik jónindegi memorandýmǵa qol qoiyldy. Osy ekijaqty kelisim boiynsha óńirimizde quny 3 mlrd. teńge bolatyn jalpy aýmaǵy 25 875 sharshy metrdi quraityn 4 úi (373 páter) salynady dep josparlanyp otyr.
Aijanat Baqytqyzy
«Nurly jol» boiynsha ótinish qabyldaý bastaldy
