Elimizde qurylys indýstriiasyn damytý jónindegi is-sharalar jospary ázirlenedi. Bul týraly búgin turǵyn úi saiasatynyń jańa tásilderi qaralǵan Úkimet otyrysynda QR Premer-Ministri Asqar Mamin aitty, dep habarlaidy QazAqparat.
Otyrysta Úkimet basshysy Indýstriia jáne infraqurylymdyq damý ministrligi usynǵan tásilderdi qolaityndyǵyn aita kele birqatar máselege nazar aýdartty.
«Birinshi. Jańa tásilderdi tiimdi iske asyrý úshin tiisti zańnamalyq túzetýlerdi tezdetip qabyldaý kerek. Indýstriia ministrligine osy jylǵy 25 naýryzǵa deiin tiisti zań jobasyn Úkimetke engizýdi tapsyramyn. Zańnamalyq túzetýlerdi qabyldaǵannan keiin «Nurly jer» memlekettik baǵdarlamasyna da tiisti ózgerister engizý qajet», - dedi Asqar Mamin.
Premer-Ministr ekinshiden, barlyq óńirlerdiń ákimdikteri bólinetin qarajatty biyl tolyq igerip, turǵyn úidi paidalanýǵa berý boiynsha barlyq kórsetkishterge qol jetkizýi qajettigin eskertti.
«Óńirlerde qurylys maýsymyn ýaqtyly bastaýdyń mańyzy zor. Jer ýchaskelerin ýaqtyly bólý jáne olarǵa qajetti infraqurylymdy jetkizip, tiisti jobalyq qujattamanyń daiyn bolýyn qamtamasyz etý qajet. Úshinshi. Turǵyn úidi paidalanýǵa berý kólemi ósken saiyn qurylys materialdaryna qajettilik te artady. Osy rette, otandyq qurylys materialdaryn óndirýdi odan ári belsendi damytý kerek. Mysaly, jeke investorlardyń esebinen jalpy quny 63 mlrd teńgeden asatyn birneshe jobalar iske asyrylatyn bolady», - dedi ol.
Úkimet basshysy sendvich-panelder, konstrýktsiialar, qasbettik plitalar, jylý oqshaýlaý materialdaryn óndiretin jobalardy iske asyrý josparlanyp otyrǵanyn aitty.
«Bul baǵyttaǵy jumysty jalǵastyrý kerek. Indýstriia ministrligine «Samuryq-Qazyna» holdingimen jáne «Atameken» palatasymen birlesip, osy jylǵy 15 naýryzǵa deiin Qurylys indýstriiasyn damytý jónindegi is-sharalar josparyn Úkimetke engizýdi tapsyramyn», - dedi Premer-Ministr.
