Qoljetimdi baspanaǵa qoly jetpegen jurttyń endigi úmiti «Nurly jer» edi. Biraq prezident tapsyrǵan baǵdarlamanyń áli on ekide bir nusqasy joq siiaqty. Sebebi jaýapty ministrlik baǵdarlamamen jurttyń qalai úili bola alatynyn áli aitpai otyr.
Jaz boiy jurt bir paraq aryzyn alyp ákimdik aldyn shýlatqan. Ondaǵysy tegin beriletin 10 júzdik jerdi alý. Tegin telim joq dep bilik buqarany qaita-qaita qaitardy. Shý tolastamaǵan soń, prezident Qýandyq Bishimbaevqa jańa baǵdarlama jasaýdy tapsyrǵan-dy. Biraq eki ai ótse de kóptiń úmiti bolyp otyrǵan «Nurly jermen» jurttyń qalai úi alatyny belgisiz. Al ministr osy kúnge deiin jalpylama jaýappen qutylyp júr.
QÝANDYQ BIShIMBAEV, QR Ulttyq ekonomika ministrligi:
- Nurly jer baǵdarlamasynyń mehaniizmi ázirlenýde. Onyń arasynda ipotekalyq nesielerdi jeńildetý iske asyrylady. Jáne azamattarymyzdy úi salyp alý úshin jerlerdi infraqurylym júrgizý.
Dál osy «Nurly jerdi» talqylaýǵa táýelsiz sarapshylar búgin ministrdi shaqyrǵan. Biraq jumysbasty Qýandyq Bishimbaev kelmedi, esesine sarapshylar kamera aldynda usynystaryn aityp qaldy. Olar jurttyń qolyna jerdi eki jylǵa jalǵa berip, úi salyp úlgermese tartyp alý kerek dep otyr.
DÁÝREN BABAMURATOV, Sarapshy:
- Halyqtyń ózine berý kerek. Ózi salyp alsyn, sala almaidy ma onda jerdi bosat, senen keiin de kezekte turǵan adam bar 2 jyldyń ishinde úi sala almadyń ba dep basqa bireýge beredi. Osydan keiin adam da jerdi almas buryn myń ret oilanady.
Biliktiń 10 júzdikti halyqqa emes, qurylys kompaniialaryna bereiik degenin májilismender de quptai qoimady. Qurylysshylar jer úi salyp, jurtqa satatyn bolsa baǵasy aspandap ketedi deidi olar.
NURTAI SABILIaNOV, QR Parlamenti májilisiniń depýtaty:
- Múmkin olarǵa belgili bir jobalardy usyný kerek shyǵar, ózderi salyp alatyn. Bireýiniń úsh balasy bar, taǵy bireýiniń on balasy bar. Qarjylaryna yńǵailap salyp alýy kerek. Al qurylys kompaniialaryna beretin bolsaq baǵasy qymbattap ketýi múmkin.
«Nurly jer» halyqty úili etemiz degen úkimettiń besinshi baǵdarlamasy. 12 jyl buryn bilik sharshy metri 56 myńnan aspaityn páterler beremiz degen. Kóptiń úmiti «Qol jetimdi baspana» da jurtty jarylqai qoimady. Baspanaǵa zárý millionǵa jýyq turǵyn «Nurly jer» oryndalsa da, Almatydaǵy qisaiyp qalǵan úidiń kebin kiedi me dep kúmándanady. Aitpaqshy, memleket salǵan Alǵabas yqshamaýdanyndaǵy qisaiǵan úi úshin áli jaýapqa tartylǵan tiri jan joq.
