Aqtóbede «Nurly jer» baǵdarlamasy boiynsha taýnhaýstar men kottedjderdiń qurylysy júrip jatyr. «Nur Aqtóbe» yqsham aýdanyndaǵy qurylys aiaqtalǵan kezde myńdaǵan otbasy baspanaly bolady. Bul týraly Aqtóbe oblystyq qurylys, sáýlet jáne qala qurylysy basqarmasynyń basshysy Serik Tólenbergenov aitty, dep habarlaidy QazAqparat tilshisi.
Aqtóbe qalasynda turǵyn úi qurylysy qarqyn aldy. Qazirgi ýaqytta «Nurly jer» baǵdarlamasy boiynsha 3-4 qabatty taýnhaýstardyń qurylysy júrip jatyr. Sonymen qatar kottedjder boiy kóterýde. Qurylys jumystaryna jergilikti materialdar paidalanylyp jatyr.
«Óńirdiń qurylys indýstriiasy joǵary áleýetke ie.Turǵyn úiler, onyń ishinde jeke turǵyn úiler qurylysy úshin qajetti negizgi materialdar men buiymdar jergilikti kásiporyndarda shyǵarylady. Óńirde inertti materialdardyń óndiristik qory jetkilikti. 2016 jyly qýattylyǵy jylyna 50 myń sharshy metrdi quraityn iri paneldi tehnologiia boiynsha Úi qurylysy kombinaty paidalanýǵa berildi. Zaýyt turǵyn úilerdiń ózindik qunyn tómendetýge, qurylys ýaqytyn qysqartýǵa múmkindik berdi. 2017-2018 jyldary «Nur Aqtóbe» turǵyn úi massiviniń birneshe shaǵyn aýdanynda taýnhaýs úlgisindegi 60-qa jýyq kredittik turǵyn úilerdiń qurylysy júrgiziledi. Biyl jalpy alańy 35,9 myń sharshy metrdi quraityn 20-ǵa jýyq turǵyn úi paidalanýǵa beriledi. Turǵyn úilerdiń qurylysynda kirpish, gazoblok jáne panel sekildi materialdar qoldanylyp jatyr. Taýnhaýstar men kottedjderge biyl 900 otbasy qonystanady», - dedi Aqtóbe oblystyq qurylys, sáýlet jáne qala qurylysy basqarmasynyń basshysy Serik Tólenbergenov.
Biyl oblysta barlyǵy 650 myń sharshy metr bolatyn turǵyn úi paidalanýǵa beriledi. Jyl basynan beri 1 500-den astam páter iesin tapty. Iaǵni, 200 myń sharshy metr bolatyn turǵyn úi qurylysy aiaqtalǵan.
«Biyl 200 myń sharshy metrlik turǵyn úi qurylysy biýdjet esebinen salynady. Bul 3 myń otbasyn baspanamen qamtamasyz etetin qurylys. «Nurly jer» baǵdarlamasynyń jeke turǵyn úi qurylysyn damytý baǵyty boiynsha da birqatar jumys atqarylyp jatyr. Máselen, óńirde jer telimin alýǵa ótinish bildirgenderdiń sany 140 myńnan asty. Jer telimderin bermes buryn infraqurylymdy jetkizý qajet. Iaǵni, gaz, sý qubyryn tartyp, elektr toǵyn jetkizý jumysyn júrgizip, keiin jer beriledi. Qazir Aqtóbe qalasy mańyndaǵy aýyldarda 6 514 jer telimin berý úshin jospar ázirlendi. Dýman, Parasat, Jańaqonys-2, Baýyrlastar-3 aýyldarynyń jobasy daiyndalyp jatyr. Biyl barlyǵy 14 myń adamǵa jer telimin berý josparda bar. Onyń 10 myńy Aqtóbe qalasynan beriledi», - dedi Serik Tólenbergenov. Jyl basynan beri 1 myńnan astam adam ózderine tiesili 10 sotyq jerdi aldy.
Jalpy oblystaǵy turǵyn úi qurylysyn damytý maqsatynda injenerlik jeliler qurylysyna 7,5 milliard teńge bólý qarastyrylǵan. Qarjyǵa uzyndyǵy 649 shaqyrym bolatyn gaz, sý, káriz qubyry tartylyp, elektr toǵy júrgiziledi. Sonymen qatar biyl «Nur Aqtóbe» yqsham aýdanynda, oblys aýdandarynda kredittik jáne jalǵa beriletin kommýnaldyq turǵyn úiler salyna bastaidy. Qurylys keler jyly aiaqtalady. Qarjy jergilikti biýdjetten bólinip jatyr.
