Búgin Almatyda Qazaqstan Jazýshylar odaǵy Basqarmasynyń kezekti VI Plenýmy ótti. Jiynda eki negizgi másele talqylandy. Birinshi másele – Jazýshylar Odaǵynyń osy ýaqytqa deiin atqarǵan jumystary qorytyndylanyp, arnaiy baiandama jasaldy. Ekinshi – Qazaqstan Jazýshylar odaǵynyń aldaǵy HV Quryltaiyna daiyndyq məselesi sóz boldy.
Resmi baiandamalardan keiin, Qazaqstan Jazýshylar odaǵy basqarmasynyń Tóraǵasy Nurlan Orazalin 1996 jyldan beri jaýapty qyzmet atqaryp kele jatqanyn aita kelip, 22 jyldyq jumysyn qorytyndylap, aldaǵy Quryltaida sailaýǵa túspeitinin málimdedi.
Odan keiin Qazaqstan Jazýshylar Odaǵynyń basqarma tóraǵasynyń orynbasary, aqyn Maraltai Raiymbekuly akademik Serik Qirabaevtyń Plenýmǵa qatysýshylarǵa arnaǵan hatyn oqyp berdi.
Jaryssózge shyqqan qazaqtyń aitýly qalamgerleri Sábit Dosanov, Qabdesh Jumadilov, Maral Ysqaqbai, Tólen Ábdik, Dýlat Isabekov óz oiyn ortaǵa salyp, ózekti máselelerdi talqyǵa saldy.
QR Mádeniet jáne sport ministrliginiń Jaýapty hatshysy Qýatjan Ýáliev jazýshy qaýymǵa kórsetilip jatqan qamqorlyqtar jóninde, memleket tarapynan jasalyp jatqan jumystar týrasynda resmi baiandama jasady.
Sondai-aq Temirhan Medetbek, Beksultan Nurjekeuly, Iran-Ǵaiyp, Sumaǵul Elýbai, Marat Baidildáuly, Rafael Niiazbek, Seifolla Ospanov, Zeinolla Tileýjanov sekildi birqatar kórnekti qalamgerler minberge kóterilip, oi-pikirlerin aitty.
Pleným úzilissiz birneshe saǵatqa sozylyp, talqylanǵan máseleler boiynsha sheshim qabyldandy. Soǵan sáikes jazýshylardyń kezekti HV Quryltaiy aldaǵy 12 naýryzda ótetin bolyp belgilendi.
