QR Parlamenti Májilisiniń tóraǵasy Nurlan Nyǵmatýllinniń Qarjy ministri Baqyt Sultanovtyń kvazimemlekettik sektorǵa salynǵan qarjy qaitarymynyń kólemi týraly suraqqa bergen jaýabyna kóńili tolmady, dep habarlaidy QazAqparat.
"Kvazimemlekettik sektorǵa kóptep qarjy salynsa da, nege Ulttyq qorǵa bar-joǵy 7,5 mlrd teńge qaitqan? Onyń ústine, Qarjy ministrliginiń derekteri boiynsha barlyq negizgi jetekshi kompaniialar, onyń ishinde Qazaqstannyń qurylys jinaq banki, "Eir Astana", "QTJ" 2020 jylǵa deiingi aralyqta jekeshelendiriledi", - degen suraq qoiyldy Qarjy ministrine QR Parlamenti Májilisindegi "Qazaqstan Respýblikasynyń Ulttyq qorynan 2018-2020 jyldarǵa arnalǵan kepildendirilgen transfert týraly" QR Zańy jobasyn talqylaýda.
Jaýap retinde Sultanov birqatar statistikalyq derekterdi keltirdi.
«Búginde keshendi jospar boiynsha shamamen 113 milliard teńgege 291 nysan satyldy. Onyń ishinde respýblikalyq menshik boiynsha - 8 milliardtan astam teńgege 23 nysan, kommýnaldy menshik boiynsha 33 mlrd teńgege 162 nysan jáne kvazimemlekettik sektor boiynsha 70 mlrd-tan astam teńgege 106 nysan satyldy. Eger nysan respýblikalyq menshik boiynsha bolsa - qarajat respýblikalyq biýdjetke túsedi, ulttyq kompaniialar men olardyń enshiles uiymdaryn satýdan túsken qarajat sáikes kompaniialardyń esepshottaryna túsken", - dedi ministr.
«Biylǵy kóktemde biýdjettik zańnamaǵa túzetýler engizildi. Ózderińiz biletindei, Memleket basshysy jekeshelendirýden túsetin qarajatty Ulttyq qorǵa jiberý týraly tapsyrma berdi jáne qazirgi ýaqytta Úkimettiń barlyq sáikes qaýlylary bar", - dep tolyqtyrdy ol.
Májilis tóraǵasy Nurlan Nyǵmatýllinniń bul jaýapqa kóńili tolmady.
«Sózińizde ilip alar eshteńe joq! Durys jaýap berińiz nemese múldem jaýap bermeńiz, ministr myrza! 2014 jyldan beri kvazimemlekettik sektor 680 mlrd teńgege tolyqtyrylǵan. Jekeshelendirýden 7,5 milliard teńge qaitqan, osyǵan qatysty pikir bildirseńiz. Úkimettik áriptester, búgingi jumys kúnimizdi uzartaiyq pa? Naqty suraqtar boiynsha jumysqa kósheiik. Jaýaptan sytylyp ketem dep oilamańyzdar", - dedi ol.
Sultanov qoiylǵan suraqqa taǵy da jaýap berýge umtyldy jáne bul jaýaby kóńilden shyqqan tárizdi.
«Respýblikalyq biýdjetten bólingen qarajat, onyń ishinde daǵdarysqa qarsy jáne infraqurylymdyq damý baǵdarlamalaryn qarjylandyrý maqsatynda Ulttyq fondtan bólingen maqsatty transfertter qarjysy naqty jobalarǵa salyndy. Jekeshelendirý júrgizilgen kezde - negizinen beiindi emes aktivter jáne ulttyq holdingter men kompaniialardaǵy naqty uiymdar jekeshelendiriledi. Somalary salystyrýǵa kelmeidi. Bólingen qarajattyń barlyǵy naqty jobalarda bólingen jáne sonda júzege asyrylyp jatyr", - dep túsindirdi ol.
«Naqty jaýapqa jaqyndadyńyz...», - dep qysqa qaiyrdy Májilis tóraǵasy.
Aita keteiik, búgin QR Parlamenti Májilisinde "Qazaqstan Respýblikasynyń Ulttyq qorynan 2018-2020 jyldarǵa arnalǵan kepildendirilgen transfert týraly" QR Zańy jobasy talqylanyp, maquldandy. QR Ekonomika ministri Timýr Súleimenovtiń baiandaýynsha, 2020 jyldan bastap Ulttyq qordan kepildendirilgen transfert kólemi 880 mlrd. teńgege qysqarady.
