Táýelsizdik kúni qarsańynda Májilis Tóraǵasy Nurlan Nyǵmatýlin depýtattarǵa jáne apparat qyzmetkerlerine Prezident Jarlyǵymen berilgen memlekettik marapattardy tapsyrdy, dep habarlaidy "Ult aqparat".
Nurlan Nyǵmatýlin Táýelsizdik kúniniń barlyq qazaqstandyqtar úshin mańyzdylyǵy, elimizdiń osy jyldardaǵy jetistikteri týraly aityp:
- Tuńǵysh Prezidentimiz, Elbasy Nursultan Ábishuly Nazarbaevtyń kemel saiasatynyń arqasynda búkil álemge jedel damýshy el retinde tanymal boldyq. Zamanǵa sai bilimdi, rýhty urpaqtarymyz ósip keledi, - dedi.
Sondai-aq, Palata Spikeri Qazaqstanymyz dúniejúziniń saiasatkerleri, órkenietti el basshylary, álemdik qairatkerler bas qosatyn syily shańyraqqa ainalǵanyn, búgingi kúni Memleket Basshysy Qasym-Jomart Kemeluly Toqaev osy tolaǵai tabystarymyzdy saqtap, strategiialyq damý baǵytyn odan ári jalǵastyryp jatqanyna nazar aýdardy.
Nurlan Nyǵmatýlin depýtattyq korpýstyń elimizdi odan ári jańǵyrtý boiynsha Elbasy men Memleket Basshysy qoiǵan barlyq mindetterdiń oryndalýyn zańnamalyq turǵydan qamtamasyz etý úshin qazirgi kúrdeli jaǵdaida jumystyń jańa nysandary men mehanizmderin engizgenin atap ótti.
Memlekettik jáne qoǵamdyq qyzmeti úshin, elimizdiń áleýmettik-ekonomikalyq jáne mádeni damýyna, halyqtar arasyndaǵy yntymaqtastyq pen dostyqty nyǵaitýǵa qosqan eleýli úlesi úshin III dárejeli «Barys» ordeni Májilis depýtaty Omarhan Oksikbaevqa berilse, «Parasat» ordeni Jeksenbai Dúisebaevqa jáne Daniia Espaevaǵa tabys etildi. «Qurmet» ordeni Jambyl Ahmetbekov ie boldy. Al, «Eren eńbegi úshin» memlekettik medali Apparat qyzmetkerleri Nariman Álǵojinge, Botagóz Botabaevaǵa jáne Klara Máýtenbaevaǵa berildi.
Qazaqstan Respýblikasynyń Qurmet gramotasy Apparat qyzmetkerleri Aitbek Álipov, Aigerim Nurjanova jáne Tatiana Syzdyqovaǵa tabystaldy.
Sonymen qatar Májilis Tóraǵasy TMD Parlamentaralyq Assambleiasynyń «Dostyq» ordenin Bas prokýrordyń orynbasary Marat Ahmetjanovqa, TMD Parlamentaralyq Assambleiasynyń «Parlamentaralyq yntymaqtastyqty nyǵaitý úshin» medali Ádilet ministri Marat Beketaevqa jáne Májilis depýtaty Sergei Zvolskiige berildi. TMD Parlamentaralyq Assambleiasynyń Qurmet gramotalaryn Ábdimanap Bekturǵanov pen Muhtar Erman aldy.
Is-shara barysynda Palata Spikeri Nurlan Nyǵmatýlin zań jobalarymen tiimdi jumys isteý jáne parlamentaralyq bailanystardy keńeitý úshin memlekettik organdar ókilderiniń depýtattyq korpýspen ózara is-qimylynyń mańyzdylyǵyn atap ótti.
Sondai-aq, Memleket Basshysynyń Jarlyǵymen Qazaqstan Respýblikasynyń Abai atyndaǵy ádebiet pen óner salasyndaǵy memleket syilyǵyna Májilis depýtaty Saýytbek Abdrahmanov «Abyz Ábish» zertteýi úshin ie boldy.
