Atyraý oblysynyń ákimi Nurlan Noǵaev Teńiz vahtalyq qalashyǵyna baryp, «Teńizshevroil» JShS (TShO) basshylyǵymen jinalys ótkizdi jáne Consolidated Contracting Engineering & Procurement S.A.L. Offshore (CSER) firmasynyń jumysshylarymen kezdesti. Bul týraly oblys ákimdiginiń baspasóz qyzmetinen málim etti, dep habarlaidy "Ult aqparat".
Bul kezdesýge 30-dan astam adam jeńil dene jaraqatyn alǵan turmystyq daý sebep boldy. Oqiǵany tekserýmen, sondai-aq ken ornyndaǵy eńbekti uiymdastyrý máselelerimen Atyraý oblysy ákiminiń birinshi orynbasary bastaǵan vedomstvoaralyq komissiia ainalysady.
«Bul másele túrli eńbek jaǵdaiy saldarynan týyndady. TShO basshylyǵy da, barlyq merdigerler de sheshýi tiis júielik másele. Biz óz tarapymyzdan barynsha qoldaý kórsetýge daiynbyz. Investorlar mynany túsinýi kerek - elimizdiń aýmaǵynda jumys istep jatqan kezde zańnamany saqtaýy tiis, sondai-aq adamdardyń namysyna tietin moraldyq-etikalyq normalardy eskergeni jón. Taiaý ýaqytta jobanyń barlyq qatysýshylarymen kezdesý ótkizemiz. Oǵan kompaniianyń barlyq birinshi basshylary qatysady, osy máselelerdi sheshemiz. Eń bastysy - eńbek jaǵdaiy barlyǵyna birdei bolýy kerek», - dep atap ótti Nurlan Noǵaev.
«Teńizshevroil» JShS bas direktory Imer Bonner óz kezeginde atalmysh jaǵdaidy retteý jáne bolashaqta mundai keleńsizdikterge jol bermeý úshin kompaniia qoldan kelgenin isteitinin aitty.
«Biz jergilikti atqarýshy jáne quqyqqorǵaýshy organdarǵa shielenisti tez retteýge kómekteskeni úshin alǵys aitamyz. Óz tarapymyzdan CSER kompaniiasymen, sondai-aq basqa da merdiger uiymdarmen jumys júrgizemiz», - dedi Imer Bonner.
Jinalystan keiin oblys ákimi CSER kompaniiasynyń jumysshylarymen kezdesti. Onyń barysynda kompaniia qyzmetkerleri ákim men TShO basshylyǵynan joba jumysyn toqtatpaýdy surady.
«Biz oblys ákiminiń birinshi orynbasary bastaǵan vedomstvoaralyq komissiia qurdyq. Ol teń eńbek jaǵdaiyn qamtamasyz etý máselesimen ainalysady. Sizder komissiianyń quramyna óz ókilderińizdi qossańyzdar bolady. Meniń áriptesterim nómirlerin qaldyrady. Jaǵdaidy jaqsartý boiynsha óz usynystaryńyzdy aityńyzdar. Sizderdiń jumys kestelerińizde eshqandai ózgeris bolmaidy, jumys qalypty rejimde jalǵasa beredi», - dedi Nurlan Noǵaev.
