Sońǵy qońyraýdy keń kólemde atap ótýdiń qajeti joq. Aimaqtaǵy bilim berý salasy basshylarymen ótken jinalysta Atyraý oblysynyń ákimi Nurlan Noǵaev osyndai oi aitty, dep habarlaidy "Ult aqparat".
«Jaqynda kezekti oqý jyly aiaqtalady. Ár jyl saiyn sońǵy qońyraý saltanatyn uiymdastyrý taqyryby kóteriledi. Árine, kez kelgen ata-ana, oqýshylar da bul merekeli kúndi joǵary deńgeide ótkizgisi keletinin túsinemiz. Tipti keibir ata-analar osy sharalardy ótkizýge nesie alady eken. Sońǵy qońyraýdy atap ótýge kerek qajettilikterdi satyp alýǵa, meiramhanalarda toilaýǵa qansha qarajat shyǵyndalady?» – dedi Nurlan Noǵaev.
Oblys ákiminiń pikirinshe, saltanatty sharany qarapaiym túrde ótkizýge de bolady. Odan esh nárse mańyzyn joimaidy. Ata-analaryna ókpelep jatatyn keibir balalarǵa osyny durystap túsindirý kerek.
«Muǵalimderge syilyq satyp alýdyń qajettiligi joq. Qaita muǵalimder men mektep basshylary oqýshylarmen, ata-analarmen áńgimelesýleri tiis. Árine, bul dástúr burynnan bar, biraq barlyq otbasynyń áleýmettik jaǵdaiy birdei emes. Biz mekteppen qoshtasý – ómir jolynyń bastaýy ekenin túsindirýimiz kerek. Alda mektep túlekterin az qiyndyq kútip turǵan joq. Mine, osy jaily oilanǵan jón. Aldymen balalarymyzdyń qaýipsizdigine mán bereiik», – dep esepteidi aimaq basshysy.
Oblys ákimi bilim berý salasy basshylaryna oqý bólmeleriniń jóndeýine aqsha jinaýǵa qatysty jaýapkershilik alatyndaryn eskertti. Jergilikti biýdjette bul maqsatqa qaralǵan qarajat jetkilikti.
«Jyl saiyn mektepterdiń aǵymdaǵy jóndeýine qarjy bólemiz, ótken jyly osy maqsatqa 116 mln teńge bólindi. Biyl 135 mln teńge. Qarajat ár oqý ornyna jeke jiberiledi. Osy jetkilikti, ata-analardan aqsha jinaýǵa qajettilik joq. Mektep direktorlary men bilim berý salasynyń jaýapty tulǵalary zańsyz aqsha jinaǵany úshin jaýapkershilikke tartylady», – dep atap ótti Nurlan Noǵaev.
Jinalysta biyl oblystaǵy úzdik mektep túlekterine resmi qurmet kórsetý saltanaty 15 maýsym kúni oblystyq ákimdik ǵimaratynyń aldynda bolatyny naqtylandy.
