Jańaózen qalasyndaǵy birneshe kásiporyn jumysyn toqtatty. Bul týraly Mańǵystaý halqyna úndeý joldaǵan óńir basshysy Nurlan Noǵaev aitty, dep habarlaidy QazAqparat.
«Qurmetti mańǵystaýlyqtar! Sońǵy kúnderi Jańaózen qalasyndaǵy birneshe kásiporyn jumysyn toqtatty. Jumysshylardyń bir bóligi jumys berýshilerge jalaqyny kóterý máselesin qoiyp otyr. Qazirgi ýaqytta Jańaózen qalasynda «Qazmunaigaz» kompaniiasynyń basshysy Alik Aidarbaev jumys istep jatyr. Ol eńbek ujymdarymen kezdesip, qalyptasqan jaǵdaidy jáne olardy sheshý jónindegi qolǵa alynyp jatqan sharalardy túsindirýde. Sondai-aq, Jańaózen qalasynda jumyssyz azamattardy jumysqa ornalastyrý boiynsha osymen ekinshi apta qatarynan oblys ákiminiń birinshi orynbasary Abzal Meńdibaev bastaǵan arnaiy komissiia jumys júrgizip jatyr. Bul suraqtarda alǵa ilgerileýshilik bar», - dep atap ótedi óńir ákimi.
Oblys basshysy óńirlegi problemalardy sheshý úshin júieli jumystar júrgizilip jatqanyn da atap ótedi.
«Men barlyǵyn jaqsy túsinemin. Problemalar bar. Olardy sheshý úshin biz barlyq múddeli taraptarmen júieli túrde jumys isteýimiz kerek. Qansha qalasaq ta óńirdiń barlyq turǵyndaryn bir mezette munai-gaz salasyna jumysqa ornalastyrý múmkin emes. Biraq biz shaǵyn jáne orta biznes kásiporyndarynda, basqa da memlekettik jáne basqa kásiporyndarynda jańa jumys oryndaryn quryp, óńir ekonomikasyn ártaraptandyrýǵa tiispiz. Halyqtyń jáne eldiń amandyǵy úshin barshańyzdy sabyr saqtaýǵa jáne túsinistik tanytýǵa shaqyramyn. Kóterilgen máseleler sheshiledi. Biraq birden emes. Ol úshin ýaqyt qajet», - dedi ol.
Nurlan Noǵaevtyń atap ótýinshe, qysqa merzimde «Ózenmunaigaz» aktsionerlik qoǵamy Jańaózen qalasynyń 150 jumyssyz azamatyn jumysqa ornalastyrýy kerek. Taǵy 150 turǵyndy servistik mekemelerge jumysqa qabyldaýdy josparlap otyr.
«Men mekeme jumysshylaryn jáne kásipodaq uiymdaryn jumysberýshimen konstrýktivti dialog qurýǵa shaqyramyn. Elimizdiń Prezidenti Qasym-Jomart Kemeluly Toqaev birneshe ret atap ótkendei, bizge qordalanǵan máselelerdi ústel basynda sheshý kerek. Mańǵystaý oblysynyń ákimdigi «QazMunaiGaz» ulttyq kompaniiasynyń basshylyǵymen, basqa da memlekettik organdarmen birlesip, jaǵdaidy erekshe baqylaýda ustap otyr. Sondai-aq, Jańaózen qalasyndaǵy shaǵyn jáne orta biznes sýbektileri qosymsha taǵy 50 jańa jumys ornyn ashady. Osylaisha, arnaiy ázirlengen algoritm negizinde Jańaózen qalasynyń jumyssyz azamattary kezek-kezegimen jumysqa ornalastyrylatyn bolady. Bul – ýaqyttyń enshisindegi másele. Biz jumysqa ornalastyrýdyń osy algoritminiń ashyqtyǵy men adaldyǵyna kepildik beremiz. Jańaózen qalasynyń turǵyndary da komissiia quramynda bar», - dedi Nurlan Noǵaev.
Sonymen qatar ol mańǵystaýlyqtardy arandatýshylyqqa boi aldyrmaýǵa shaqyrdy.
«Óńir basshysy retinde, ári osy oblystyń janashyr turǵyny retinde, arandatýshylyqqa boi aldyrmaýdy jáne popýlistik urandar men bos ýádelerge aldanyp qalmaýlaryńyzdy suraimyn. Biz barlyq qiyndyqty birge jeńemiz! Sizderdi aqylmen sheshim qabyldap, ádildik tanytady dep senemin!», - dedi oblys ákimi.
