Ulttyq qorǵa qaita-qaita qolymyzdy suǵa bermeýimiz kerek. Prezidenttiń Ulttyq qor qarajatyna bailanysty eskertpesi jaily Parlament Májilisiniń depýtaty Nurlan Ábdirov pikir bildirdi, dep habarlaidy QazAqparat.
«Búgingi Joldaýda kóp áńgime aityldy. Keń kólemde aityldy. Baiqasańyzdar, keibir máselelerdi Memleket basshysy jai ǵana atap-atap qana ótti. Sebebi aitylyp júrgen keibir suraqtardy óńirlerge shyqqanda, muǵalimdermen kezdeskende keń aýqymda qaýzaǵan bolatyn. Eldiń ishinde ártúrli narazylyq týǵyzatyn jailarǵa da Memleket basshysy mańyz berip otyr. Árbir zańdy nemese tapsyrmany oryndaý – úlken taldaý jumystaryn talap etedi. Sol sebepti, jalpy qarjynyń paidalanylýyna, memlekettik qorǵa bailanysty áńgimeler tekke kóterilip otyrǵan joq. Ulttyq qorǵa qaita-qaita qolymyzdy suǵa bermeýimiz kerek», - dedi Nurlan Ábdirov Parlamenttiń birlesken otyrysynan keiin tilshilerdiń saýaldaryna jaýap bere otyryp.
Depýtattyń aitýynsha, eger shaǵyn jáne mikro kásip ieleri tabys salyǵynan bosatylatyn bolsa, onda eldegi salyq bazasy azaiady.
«Ony Memleket basshysy tike aityp shyqty. Olai bolatyn bolsa, jergilikti jerdegi bilik óndiristerdi kóterýi tiis. Adamdardy óndirispen ainalysýǵa, paidaly zattardy shyǵarýǵa, óńirdegi adamdardyń timid ómir súrýge shaqyrýy tiis», - dedi Nurlan Ábdirov.
Eske sala ketsek, búgin QR Prezidenti Qasym-Jomart Toqaev Qazaqstan halqyna Joldaýyn jariialady.
«Ulttyq qor qarajatynyń aǵymdaǵy máselelerdi sheshýge jumsalýyn qysqartý qajet. Bul keleshek urpaqtyń qarjysy. Ulttyq qordyń transfertteri básekege qabiletti ekonomikany qalyptastyrýǵa baǵyttalǵan baǵdarlamalardy jáne jobalardy júzege asyrý úshin ǵana bólinýi kerek», - dedi Qasym-Jomart Toqaev.
