Ortalyq sailaý komissiiasynyń tóraǵasy Nurlan Ábdirov elorda turǵyndarymen kezdesti jáne sailaý protsesiniń máselelerin talqylady, dep habarlaidy QazAqparat.
Ortalyq sailaý komissiiasynyń tóraǵasy Prezidenttiń sailaý júiesin jetildirý týraly Joldaýyna da pikir bildirdi.
«Keshe Prezident aitqan majoritarlyq júie kóp nárseni ózgertedi. Árbir óńirde majoritarlyq júie qaitadan qalyptasýy kerek. Qazir Májiliste proportsionaldyq pen majoritarlyq júielerdiń qosyndysy paidalanylsa, máslihattarda tolyq majoritarlyq bolady. Kóp uzamai tiisti ózgerister Konstitýtsiiaǵa da, basqa zańdarǵa da daiyndalyp engiziledi», - dedi N. Ábdirov L. N. Gýmilev atyndaǵy Eýraziia ulttyq ýniversitetinde ótken kezdesýde.
Sonymen birge N. Ábdirov máslihattardyń qyzmeti men olardy qarjylandyrý máselesi ózekti bolyp otyrǵanyn atap ótti.
«Máslihat tóraǵasy degen jańa laýazym engizilip otyr. Bul bastama da bir kezderi kóterilgen bolatyn. Alaida ol kezde másele tolyq sheshilmedi», - dedi ol.
Sonymen qatar, Nurlan Ábdirov Memleket basshysynyń ortalyq sailaý komissiiasynyń tóraǵalary men músheleri partiiadan mindetti túrde shyǵýy týraly erejeni zańnamaǵa engizý tapsyrmasyn atap ótti.
«Ortalyq sailaý komissiiasynyń músheleri – jeti adambyz, onyń úsheýi Prezident Jarlyǵymen taǵaiyndalady, ekeýin Májilis, ekeýin – Senat taǵaiyndaidy. Osy jeteýdiń bári de partiiadan tys bolý kerek dep keshe Prezidentimiz aityp ketti», - dedi Nurlan Ábdirov.
«Mysaly ózim 25 qańtarda Prezident taǵaiyndaǵannan keiin erteńine aryz jazyp, Nur Otan partiiasynan shyqqan bolatynmyn. Maǵan bul sheshim ońai bolǵan joq. Óitkeni zańda ondai norma joq – qai partiiada bolsań da ortalyq sailaý komissiiasynyń múshesi bolyp júre beresiń. Biraq men osy qyzmetke kelgennen keiin partiiada bolmaýym kerek dep jeke ózim sheshim qabyldadym. Prezidenttiń qabyldaýynda bolǵanda osy sheshimimdi aittym, durys dedi», - dedi OSK tóraǵasy.
