82 jastaǵy Nurǵali Núsipjanov úilendi. Jelide estrada juldyzynyń úilený toiynan sýretter men beinejazbalar tarap ketti dep jazady "Ult aqparat".
Nurǵali Núsipjanovtyń tańdaýy belgili jýrnalist Jadyra Seideshke túsken. Muny toida bolǵan Qazaqstannyń eńbek sińirgen ártisi Merýert Ótekeshova rastady.
"Nurǵali Núsipjanov pen Jadyra Seideshtiń úilengeni ras. Toi keshe Almatyda ótti. Oǵan men de qatystym. Toi óte keremet ótti. Nurǵali Núsipjanovtyń eń jaqyn dostary boldy. Onyń ishinde men de barmyn. Olarǵa tek qana zor densaýlyq, baqyt tileimin", - dedi ol.
Nurǵali Núsipjanovtyń tańdaǵan jary – Jadyra Seidesh 1982 jyly dúniege kelgen. Ol Ulttyq arna, Qazaq radiosy, KTK arnasynda kóp jyl jýrnalist, telejúrgizýshi bolyp istegen. 2015 jyly "Júrekjardy" avtorlyq baǵdarlamasy úshin "Serper" jastar syilyǵynyń laýreaty atandy.
Úilený toiynda Jadyra Seidesh qudai qosqan qosaǵyna júrekjardy tilegin jetkizdi. Videosyn áleýmettik jelide telejúrgizýshiniń burynǵy áriptesteriniń biri jariialaǵan.
"Men sizdiń jan dúnieńizdiń tazalyǵyn syiladym. Sondyqtan endi esh ýaqytta aýyryp, men qorqytpańyzshy. Súrinbeńizshi, qulamańyzshy, asqar taýym dep tańdadym ǵoi. Meniń asqar taýym bolyp, Jambyl jákemniń jasynan asyńyz. Men soǵan qyzmet etemin dep keldim. Endi, sizdiń ómirińiz osy torttai tátti ómir bolsyn", - dedi qalyńdyq Nurǵali Núsipjanovtyń qolynan ustap turyp.
Sondai-aq Jadyra halyq ártisine urpaq syilaǵysy keletinin de aitty.
"Ádemi jasyńyzda áke atansańyz, onyń nesi aiyp? Jaqsy adamnyń artynan urpaq qalýy kerek. Alladan sizdiń qolyńyzdan ustap turyp, bir ǵana tilek tileimin. Kishkentai ǵana Nurǵaliuly bizdiń shańyraǵymyzdy shattyqqa keneltip, ómirge keletin sol sábidiń tilegimen kún kesheiikshi. Qashan da men sizdi arqa tutyp, siz meni medeý etińiz", - dep sózin aiaqtady ol.
Nurǵali Núsipjanov 1937 jyly 5 qańtarda Taldyqorǵan oblysynyń Gvardiia aýdanyndaǵy Kúreńbeldiń (Altynemel) janyndaǵy Dolanaly aýylynda týǵan. Ol - Qazaqstannyń halyq ártisi. Qazaqstannyń memlekettik syilyǵynyń laýreaty. Parasat, Qurmet ordenderiniń iegeri.
Ashyq derekkózdegi aqparatqa súiensek, Nurǵali Núsipjanovtyń birinshi áieliniń esimi – Aigúl. Olar Bibigúl, Alma, Dariǵa, Nurgúl, Nurzar atty bes bala tárbielep ósirgen.
