Múgedekter arbasyna tańylǵan taldyqorǵandyq áleýmettik kásipker Nurbolat Qarabasov múmkindigi shekteýli jandarǵa qolarba usynyp, kásip jasap otyr. Volonterler jyly ol Qazaqstannyń volonterlik qyzmetiniń brendi qalyptasatynyna senedi, dep habarlaidy QazAqparat.
«Men 2017 jyly «Jas prioject» jobasyna qatysyp, osyndai qurylǵylardyń (ózi mingen múgedek arbasynyń róli bar, ózi qozǵalatyn zamanǵa sai túri - qolarba) túr-túrin bes ai boiy tegin berip, qyzmet kórsettim. Men jaqsylyq jasaý arqyly múmkindigimniń shekteýsiz ekenine kózim jetti. Osydan keiin birneshe áleýmettik jobaǵa qatysyp, Almaty jáne Túrkistan oblystarynda osy qurylǵylardy jalǵa berip, qyzmet kórsete bastadym. Bizdiń maqsatymyz – qolarbada otyrǵan jandardyń tórt qabyrǵaǵa qamalmai, qoǵammen tyǵyz qarym-qatynas jasap, dostarymen kezdesip, kinoǵa baryp degendei, laiyqty ómir súrýine jaǵdai jasaý», - deidi Nurbolat Qarabasov.
Áleýmettik kásipkerde qazirge deiin osyndai qolarbanyń alpysy bar.
«Bul qurylǵylardy shetelden aldyramyz. Alpys paiyzy qurastyrylǵan túrde keledi. 40 paiyzyn ózimiz qurap, jalǵa berip qyzmet kórsetemiz. Iaǵni bul qurylǵy 3 sekýndta kez kelgen arbaǵa jalǵanyp, saǵatyna 27 shaqyrymdy baǵyndyra alady. Bir qýattaǵanda – 30 shaqyrymǵa jetedi. Men máselen Taldyqorǵanda tańerteń segizde úiimnen shyǵyp, keshki jetige deiin osy qolarbamen júre beremin», - deidi ol.
Áleýmettik kásipker volonterlik degendi qalai túsinetinin aityp berdi.
«Volonterlik degenimiz – belgili bir dárejede asar. Adamdar asarlatyp, bir-birine kómektesýi kerek. Kásibim arqyly qoǵamǵa kishkene bolsyn úlesimdi qossam deimin. Volonterlik jasqa qaramaidy. Osy qolarba joq kezde Taldyqorǵanda bir kishkene bala arbama jaqyndap, «aǵa, kómekteseiin be?» degen kezde júregim eljirep, kózime jas keldi. Bizdiń qazaq baladan qarttaryna deiin bir-birine kómek qolyn sozýǵa daiyn turady. Volonterlik keiin shyqqan sóz bolǵanymen, qazaqta burynnan bar úrdis», - deidi Nurbolat Qarabasov.
Áleýmettik kásipker «Birgemiz» respýblikalyq front-keńsesiniń ashylýy volonterlarǵa jiger beredi dep senim bildirip otyr.
Aita ketsek, Prezident Qasym-Jomart Toqaev elordada EKSPO kórmesiniń «Art Hub» pavilonynda ornalasqan volonterlerdiń «Birgemiz» respýblikalyq front-keńsesiniń ashylý saltanatyna qatysty. Front-keńse búkil Qazaqstannyń volonterleri úshin keńes berý, ádistemelik, oqytý jáne aqparattyq ortalyqqa ainalatyn bolady. Sondai-aq, ol volonterlik jobalar men oqytý baǵdarlamalaryn úilestirý, monitoring jasaý, volonterlikti ilgeriletý boiynsha biryńǵai aqparattyq saiasatty júrgizedi jáne biryńǵai Call-ortalyqtyń jumysyn uiymdastyrady.
.jpeg)