Elimizge belgili fýtbolshy Nurbol Jumasqaliev sporttan ketetindigin habarlady. Ol búgin «Tobyl» sapynda sońǵy márte jasyl alańǵa shyǵyp, Petropavldyń «Qyzyljar» komandasy qaqpasyna gol soqty, dep habarlaidy "Ult aqparat".
Nurbol Jumasqaliev 1981 jylǵy 11 mamyrda Oral qalasynda dúniege kelgen. Fýtbolshylyq mansabyn 1998 jyly Oraldyń «Naryn» komandasy sapynda bastady. 1999-2000 jyldarda Taldyqorǵannyń «Jetisý» klýbynda oiyn kórsetse, 2000-2010 jyldarda Qostanaidyń «Tobylynyń» jeidesin kidi. Al 2011-2012 jyldarda Astananyń «Lokomotivinde» dop tepse, odan keiin tórt jyl boiy qaitadan «Tobyldyń» namysyn qorǵady. 2017 jyly Pavlodardyń «Ertisinde» 7 oiyn ótkizip qaitqanymen, sol jyly «Tobylǵa» qaita keldi.
Biylǵy birinshilikte qola júldeger atanǵan «Tobyldy» búgingi «Qyzyljarmen» ótken oiynnan keiin marapattaý rásimi ótti. Atalmysh shara barysynda Nurbol Jumasqaliev óziniń atalmysh sheshimi jaiynda jankúierlerine aitty.
«Búgin aimaq jurtshylyǵy úshin mańyzdy kún. Komanda atynan qoldý bildirgen barlyq azamatattarǵa rizashylyq bildirgimiz keledi. Áriptesterimdi de úlken jetistigimmen quttyqtaimyn. Búgingi oiyn men úshin erekshe boldy. Fýtbolshylyq mansabymdaǵy sońǵy kezdesýmdi ótkizdim», - dedi Nurbol Jumaqaliev.
Esterińizge sala ketelik, biylǵy jyldyń tamyz aiynda Kókshetaýdyń «Oqjetpesi» sapynda oinaityn belgili fýtbolshy Álibek Bóleshov fýtbolshylyq mansabyn aiaqtaǵanyn málim etti. Al ústimizdegi jyldyń basynda Samat Smaqov sportpen qosh aitysqanyn jariialap «Aqtóbe» komandasynyń direktory bolyp taǵaiyndalǵan edi. Sondai-aq, búgin álemgi belgili fýtbolshy Andrei Arshavin Almatynyń «Qairaty» sapynda sońǵy oiynyn ótkizdi.
