Qazaqstan Táýelsizdiginiń 30 jyldyǵy qarsańynda elordada «TEATR ALL Nur-Sultan theatre week» teatr festivali ótedi. Oǵan qalanyń jáne sheteldiń 11 úzdik ujymy qatysyp, 20-dan astam qoiylym kórsetedi, dep habarlaidy "Ult aqparat" qala ákimdiginiń resmi saityna silteme jasap.
Teatr festivali elordada 28 qazan men 1 qarasha aralyǵynda ótedi. «Astana Opera» teatry men qazaq drama teatry úzdik qoiylymdaryn kórsetedi. Q.Qýanyshbaev atyndaǵy komediia teatry Á.Mámbetova atyndaǵy orys drama teatry sondai-aq, elordalyq qýyrshaq teatrlary, MTJO, «Jastar», «Naz», «Astana Musical» teatry da óz ónerlerin ortaǵa saldy. Festivaldiń qurmetti qonaqtary retinde elordaǵa S.Obraztsova Kishi Bronnaia atyndaǵy Máskeý drama teatrynyń jáne memlekettik akademiialyq qýyrshaq teatrynyń shyǵarmashylyq ujymdary shaqyryldy.
Bes kún boiy elordanyń teatr sahnalarynda festival qatysýshylary ózderiniń jetekshi spektaklderin kórsetedi, sondai-aq sheberlik synyptary, zamanaýi jáne beineleý óneriniń kórmeleri uiymdastyrylady. Festival baǵdarlamasyna «Qyz Jibek» operasy, «Abai-Toǵjan» mýzykalyq dramasy, «Qunanbai», «Jarqanat», «Romeo men Djýletta», «Jibek» spektaklderi, «Jizel» baleti jáne t.b. kiredi.
«Bul mádeni sharanyń maqsaty mádeniet qairatkerlerin qoldaý, kórermender úshin de, festival qatysýshylary úshin de merekelik kóńil-kúi syilaý. Bul festivaldi ótkizýge alǵash ret qalanyń barlyq infraqurylymy, onyń ishinde shaǵyn jáne orta biznes tartylady. Teatr aptalyǵy kezinde kórmeler, teatr sahnasynyń jetekshi teatrlary men metrleriniń túrli sheberlik synyptary uiymdastyrylady, sondai-aq qala turǵyndary arasynda spektaklderdiń qyzyqty premeralyq qoiylymdaryna biletter oinatylady. Teatr aptalyǵyn uiymdastyrýǵa qatysty barlyq aqparat www.visitnursultan.kz saitynda ornalastyrylady», - dep habarlady buǵan deiin elorda ákimi Altai Kólginov.
Táýelsizdiktiń 30 jyly ishinde elordanyń mádeni ómiri aitarlyqtai ózgergenin atap ótken jón. Osy jyldar ishinde qalada 10-nan astam teatr ashyldy, olardyń ujymdaryn elorda men shet elderdiń kórermenderi jyly qarsy alady.
