Elordada qoǵamdyq kólik tarifin kóterý máselesi qarastyrylyp otyrǵan joq. Bul týraly búgin «Astana LRT» JShS basqarma tóraǵasy Bekmyrza Igenberdinov aitty, dep habarlaidy "Ult aqparat".
«Saralanǵan tarif engizilgennen keiin tasymaldaýshylardyń tabysy shamamen 40 paiyzǵa artty. Sonymen qatar shtat pen jalaqynyń artýy esebinen shyǵyn da ósti. Qosalqy bólshekter satyp alyp, jyljymaly quramdy tártipke keltirdik. Soǵan sai jazǵa jáne qysqa daiyndyq júrgizildi. Endi kiris pen shyǵys arasynda aiyrma biýdjet esebinen jabylýy tiis. Eger biýdjet mundaiǵa daiyn bolmasa, onda ekinshi nusqa retinde tarifti kóterý týraly aitýǵa bolady. Biraq ázirshe biz tarifti kóterý jaiynda sóz qozǵap otyrǵan joqpyz», - dedi ol «Qoǵamdyq kólik: reformalar jáne damý joldary» atty konferentsiia aiasynda BAQ ókilderine bergen suhbatynda.
Onyń atap ótýinshe, qazirgi ýaqytta kompaniia bir jyldaǵy jolaýshylar tasymalyna qatysty derekterdi alǵan. Atalǵan derekter saraptamalyq esepteýlermen birge tariftik komiissiianyń qaraýyna engizilip otyr. Osydan keiin bul másele qoǵamdyq keńeste, qalalyq máslihatta talqylanyp, esep aiyrysý tarifi qandai bolýy kerektigi anyqtalady.
«Bekitilgen tarifti aýystyrý, iaǵni 90 teńgeden kóterý jaiynda sóz qozǵalyp otyrǵan joq. Biz sýbsidiialaý múmkindigi jáne avtobýs parkteri alýy tiis jetispeitin qarajat jaiynda aityp otyrmyz. Bizdiń esebimizge sáikes, avtobýs parkterine jylyna 15,7 mlrd teńge qajet. Jalpy, jyl sońyna deiin 90 teńge deńgeiinde bekitilgen tariftiń kóterilmeitinine senimdimin», - dedi B.Igenberdinov.
Onyń atap ótýinshe, kelesi jyly qoǵamdyq kólik tarifterine qatysty másele talqylanady, biýdjettik múmkinshilikter qarastyrylady.
«Sodan keiin biz qalalyqtarǵa qolaily bolatyn qandai da bir jańa tariftik jospar engizemiz nemese biýdjet óz baptaryn qaita qarastyrady. Óitkeni, barlyq baǵdarlar anyqtalǵan. Buǵan qosa, qalanyń jartysy qoǵamdyq kólikpen júredi. Sondyqtan qazir narazylyq tolqynyn týyndatýdyń máni de joq. Menińshe, ákimdikpen birlesip kóńilge qonymdy ári ońtaily sheshim tabamyz», - dedi kompaniia basshysy.
