Biyl kúzde elorda ákimdiginiń janynan «Januia» otbasyn qoldaý ortalyǵy ashylady, dep habarlaidy QazAqparat tilshisi.
Bul týraly Nur-Sultan qalasy ákiminiń orynbasary Baqtiiar Máken Otbasylar forýmynda aitty.
«Otbasy degende oiymyzǵa ana túsedi. Óitkeni ol – oshaqtyń uiytqysy. Anaǵa qoldaý kórsetpei, otbasyn qoldaý múmkin emes. Elordada tirkelgen 96 myń jeke kásipkerdiń 50 myńy áielder. Sońǵy 4 jylda áielder usynǵan 182 startap joba ákimdik tarapynan qoldaý tapty», - degen ákimdik ókili biyl kúzde otbasyn qoldaý úshin qurylatyn «Januia» ortalyǵynyń qyzmetine toqtaldy.
«Qyrkúiek aiynda otbasylardy qoldaýǵa arnalǵan «Januia» atty ortalyq ashylady. Qazir onda jóndeý júrip jatyr. Bul ortalyq ásirese qiyndyqqa tap bolǵan januialarǵa kómek kórsetetin bolady. Basyna aýyrtpalyq túsken analarǵa ońtaily bolýy úshin kórsetiletin qyzmettiń bári «bir tereze» printsipimen jumys isteitin bolady. Ortalyqta balalardyń oiyn alańy da qarastyrylady. Al analarǵa quqyqtyq, psihologiialyq, meditsinalyq turǵyda kómek kórsetiledi. Kásip ashý, jumys tabý, baspana alý boiynsha da naqty keńester berilip, qujat rásimdeý boiynsha kómekter kórsetiledi», - dedi Baqtiiar Máken.
