QR Ulttyq olimpiada komitetiniń prezidenti Timýr Qulybaev Nur-Sultanda Ulttyq sport ýniversitetin ashý kózdelip otyrǵanyn málim etti, dep habarlaidy QazAqparat.
«Biz Nur-Sultan qalasynda Ulttyq Olimpiada komiteti arqyly alǵa Ulttyq sport ýniversitetin qurýdy maqsat etip otyrmyz. Mundai naqty maqsat bar. Alaida ókinishke qarai dál qazirgi ýaqytta qarjylandyrý máselesi sheshilgen joq. Mundai máseleni qarastyrý boiynsha Memleket basshysy tapsyrma berip qoiǵan. Álbette, mundai ulttyq Joǵary oqý ornynyń bazasynda ǵylymi jumystar júrgiziledi. Jetistikke jetken ár sportshynyń daiyndyǵyn, psihikasyn zertteitindei ǵylym bolýy kerek. Bapkerler osy rette oqýlyq ázirleýi tiis. Sebebi, boksty alyp qaraǵannyń ózinde bizde biregei jetistikterdi toptastyryp, oqýlyq retinde shyǵarýǵa tolyq múmkindik bar», - dedi Timýr Qulybaev Qazaqstan boks federatsiiasynyń otyrysynda.
Onyń aitýynsha, oblys ortalyqtarynda sport kolledjderin ashý týraly úkimettik deńgeide tapsyrma bar.
«Sportshylar osy kolledjderdiń bazasynda oqyp, teoriialyq bilim alyp, sonymen qatar, bolashaqtaǵy mamandyǵyn birge oqyp alyp júrýi tiis. Oblys ortalyqtaryndaǵy barlyq sportshylar halyqaralyq deńgeige shyǵa almaýy múmkin. Sportshylardyń kóbi jasóspirim shaqtan eresektikke ótken kezde bolashaǵy týraly oilana bastaidy. Bapkerlerge de jumys tabylary anyq», - dedi ol.
Eske sala ketsek, Qazaqstan boks federatsiiasynyń búgingi otyrysynda Timýr Qulybaev atalmysh federatsiia basshylyǵynan ketetinin málimdegen bolatyn.
Onyń ornyna belgili qazaqstandyq biznesmen Keńes Raqyshev sailandy.
