Nur-Sultan qalasynyń ákimdigi gaz tarifiniń bekitilgenin jariialady, dep habarlaidy "Ult aqparat".
Elorda ákimi Altai Kólginov qoǵamdyq keńes múshelerimen kezdesýde gaz júrgizý barysy, uzaqqa sozylǵan nysandar qurylysy, turǵyn aýdandarda júrgizilip jatqan jumystar, áleýmettik mańyzy bar taýarlar baǵasyn turaqtandyrý sharalary jáne qalanyń damýy týraly aitty.
Onyń sózinshe, eger buryn gazdyń tekshe metri - 60 teńge bolsa, ákimdik ortalyq ýákiletti organdarmen birge aqshany únemdeý maqsatynda ony tómendetý úshin aýqymdy jumys júrgizgen. Osylaisha, gazdyń tekshe metriniń baǵasy 45 teńgege deiin tómendetilgen.
Osylaisha, elorda turǵyn aýdandarynda kvartalishilik gazben jabdyqtaý jelilerin salý boiynsha aýqymdy jumys júrgizilýde. Mysaly, Jeleznodorojnyi turǵyn alabynda 100%, Promyshlennyi jáne Kóktal-2 turǵyn alaptarynda 95%, Kóktal-1 turǵyn alabynda 80% gaz taratý jelileri tartylǵan.
Bul jumystar Agroqalashyq, Ońtústik-Shyǵys turǵyn alaptarynda da júzege asyrylady. Atalǵan turǵyn aýdandar halqy, sondai-aq Agroqalashyq turǵyn alabynyń bir bóligi aldaǵy jylytý maýsymynda úilerin gazben jylytady.
Ol úshin turǵyndar úilerdi gazǵa qosýdyń tehnikalyq sharttaryn alýǵa front-keńselerge habarlasýy kerek. Jeke sektor turǵyndary úshin ákimdik eseptegishterdi tegin usynady.
«Elordany gazdandyrý - Elbasynyń tarihi jobasy. «Saryarqa» gaz qubyrynyń ońtústik aimaqtan elordaǵa deiin 1000 shaqyrymnan astam joly tartyldy. Bul óte úlken jumys, jobaǵa milliardtaǵan qarajat quiyldy, ol ýaqyt óte kele qaitarylýy kerek. Gazdandyrý qorshaǵan ortany jaqsartýǵa ǵana emes, turǵyndardyń densaýlyǵyna paidaly áser etedi, sonymen qatar jeke sektor turǵyndarynyń ómir súrý jaǵdailaryn aitarlyqtai jeńildetedi. Aqyr sońynda, uzaq qys ailarynda birneshe saǵat saiyn úidi jylytýdyń, kómir túsirip, ony saqtaýdyń qajeti bolmaidy. Adamdar kómirtegi totyǵymen ýlanǵan jaǵdailar boldy. Bul máselelerdiń barlyǵy sheshimin tabady. Gaz kómirge qaraǵanda salystyrmaly túrde qymbat, biraq onyń artyqshylyǵy kóp, eń aldymen bul - qaýipsiz otyn túri. Sonymen qatar biyl biz JEO-1 jáne JEO-2-de birqatar qazandyqtardy gazǵa aýystyrýdy josparlap otyrmyz. Gazdandyrý protsesi úsh kezeńge bólinedi, kezeń-kezeńimen barlyq turǵyn aýdandar gazǵa qosylady. Bul másele Memleket basshysynyń baqylaýynda», - dedi elorda ákimi Altai Kólginov.
