Elordada koronavirýs infektsiiasyna bailanysty 645 adam aýrýhanaǵa jatqyzyldy, onyń ishinde 62 bala bar. Bul týraly Nur-Sultan qalalyq Qoǵamdyq densaýlyq saqtaý basqarmasynyń basshysy Sáýle Qisyqova málim etti, dep habarlaidy QazAqparat.
«21 naýryzda saǵat 08.00-degi jaǵdai boiynsha elorda aýrýhanalarynda barlyǵy 645 adam jatyr, onyń 62-si - balalar. Osy ýaqytqa deiin Nur-Sultan qalasynda 28 adamda koronavirýs infektsiiasy anyqtaldy», - dedi basqarma basshysy qala ákimdiginde ótken onlain-brifingte.
Jas erekshelikteri boiynsha, 18 jasqa deiingi eki naýqas (4 ailyq náreste, 14 jastaǵy jasóspirim), 18-29 jas aralyǵynda - úsh naýqas, 30-49 jas aralyǵynda - 18 naýqas, 50-59 jas aralyǵynda - tórt adam jáne 60 jastan asqan bir naýqas bar.
Buǵan deiin Sáýle Qisyqova 20 naýryz kúni koronavirýs infektsiiasy anyqtalǵan 3 naýqastyń jai-kúiin aityp berdi. 4 ailyq nárestesi bar otbasy 19 naýryzda Parij-Minsk-Nur-Sultan reisinen túsirilip, aýrýhanaǵa jetkizilgen.
