Elordada «VOLGA DNEPR AIRLINES» kompaniiasynyń ushaǵy toqtatyldy. Memlekettik kirister komiteti jaǵdaidyń sebebin túsindirdi, dep habarlaidy "Ult aqparat".
26 maýsymda jergilikti ýaqytpen saǵat 13:40-ta elordanyń «Nursultan Nazarbaev» Halyqaralyq áýejaiynda «VOLGA DNEPR AIRLINES» áýe kompaniiasynyń Úrimshi (QHR) – Nur-Sultan – Máskeý baǵytyndaǵy kommertsiialyq reisin iske asyryp jatqan RA-82074 nómirli áýe kemesi toqtaǵan.
"Áýejaidyń jerústi qyzmeti dereý "Áýejai Astana" keden beketiniń qyzmetkerlerin habardar etti. Degenmen áýe kemesiniń ekipajy jáne olardyń ókili belgilengen ýaqyt ishinde kedendik rásimdeýge qajetti qujattar men málimetter usynbaǵan. Sondyqtan áýe kompaniiasyna qatysty QR «Ákimshilik quqyq buzýshylyq týraly» Kodeksiniń 538-babymen ákimshiliktik óndiris qozǵaldy. Onda jiyrma ailyq eseptik kórsetkish mólsherinde aiyppul qarastyrylǵan.
Qazaqstan Respýblikasynyń kedendik zańnamasyna sáikes, tasymaldaýshy nemese ózge de belgilengen tulǵalar kelýi týraly habardar etken kezden bastap keden organynyń jumys ýaqytynyń úsh saǵaty ishinde kólik quralyna kedendik deklaratsiiany tapsyrýǵa mindetti", - dedi vedomstvo ókilderi.
