Qarashanyń 1-nen 2-sine qaraǵan túni Nur-Sultan áýejaiyna 674 jolaýshy ushyp keldi. Onyń ishinde PTR-test anyqtamasy joq 35 jolaýshy karantin statsionaryna jetkizildi, dep habarlaidy "Ult aqparat".
Qarashanyń 1-nen 2-ne qaraǵan túni Nur-Sultanǵa Air Astana, Belavia, Turkish Airlines áýe kompaniialarynyń 5 ushaǵy kelip qondy. Osy ushaqtarmen 674 jolaýshy kelip, PTR anyqtamasy bolmaǵan 35 jolaýshy statsionarǵa jetkizilgen. Olar PTR testen ótkennen keiin koronavirýs anyqtalmasa - úiine, anyqtalsa - infektsiialyq statsionarǵa jatqyzylady.
Eske sala ketsek, buǵan deiin Shyǵys Qazaqstan oblysyndaǵy epidemiologiialyq ahýaldy turaqtandyrý maqsatynda vedomstvoaralyq komissiianyń tóraǵasy birqatar shekteý sharasyn engizýdi tapsyrdy:
2 qarashadan bastap Óskemen qalasyna kirý jáne shyǵý boiynsha áýe qozǵalysyn azaitý: Nur-Sultan qalasyna/nan— aptasyna 17-den 7 reiske deiin;
Almaty qalasyna/nan — aptasyna 14-ten 7 reiske deiin; Shymkent qalasyna/nan — aptasyna 2-den 1 reiske deiin;
2 qarashadan bastap Nur-Sultan – Óskemen baǵyty boiynsha temirjol qatynasyn aptasyna 3-ten 1-ge deiin;
Almaty – Óskemen baǵyty boiynsha aptasyna 7-den 3-ke deiin qysqartý.
Nursultan Nazarbaev halyqaralyq áýejaiy memlekettik organdarmen birge koronavirýs infektsiiasynyń aldyn alý úshin naqty sharalar keshenin júzege asyrýda:
● Jolaýshylar mindetti túrde termometriiadan ótýi kerek. Ol úshin teplovizorlyq smart-kameralar qoldanylady.
● Jolaýshylar terminalynda táýlik boiy sanitarlyq-karantindik beket brigadalary kezekshilikte júredi.
● Ishki jáne halyqaralyq reisterde ushý jáne qoný aýmaǵytarynda jolaýshylarǵa arnalǵan sanitaizerler ornatylǵan.
● Jolaýshylardy tirkeý, sonymen qatar Nursultan Nazarbaev halyqaralyq áýejaiynyń aýmaǵynda 1,5 mterlik áleýmettik qashyqtyqty qamtamasyz etý tártibi edende naqty syzbamen kórsetilgen.
● Áýejaidyń ishki aýmaǵyn arnaiy dezinfektsiialyq quraldardy paidalana otyryp, sanitarlyq óńdeý jiiligi artty. Virýsqa qarsy belsendilikke ie antiseptik qoldanylady.
● Nursultan Nazarbaev halyqaralyq áýejaiyna keletin áýe kemeleriniń bári de dezinfektsiialyq óńdeýden ótedi. Sonymen qatar turaqty túrde jolaýshylarǵa qyzmet kórsetetin tehnikada dezinfektsiialyq jumystar júrgiziledi.
● Koronavirýs infektsiiasynyń taralýynyń aldyn alý boiynsha áýejai qyzmetkerlerimen nusqaýlyq júrgiziledi.
