Nur-Sultanda politsiia qyzmetkeri aýyr jaraqat alǵan qart adamnyń aýrýhanaǵa jetýine kómektesti, dep habarlaidy elorda ákimdiginiń resmi saity.
Bul Facebook áleýmettik jelisinde jazba jariialanǵan. Habarlamada paidalanýshy Aleksandra Darinova óziniń ákesi 12 sáýirde aýyr jaraqat alyp, jedel meditsinalyq kómekke muqtaj bolǵanyn aitady.
«12 sáýirde ákemiz aýyr jaraqat aldy. Biz qalanyń syrtynda turamyz. Óz kóligimizben, aýyl dárigerimen birge Qabanbai batyr men Qosshy boiynda ornalasqan alǵashqy blokpostqa bardyq. Olar kólikti ary qarai jibermedi. Sol jerde jedel járdemdi kútip qaldyq. Nur-Sultan qalalyq arnaiy batalonnyń aǵa leitenanty Almas Ahmetovke alǵys bildirgimiz keledi. Ol óz erkimen ákemdi arnaiy kólikpen aýrýhanaǵa apardy. Em sharalary bitkenshe kútip, bizdi arnaiy kólikpen kóligimiz turǵan blokpostqa qaita jetizip tastady», – dep jazady Aleksandra Darinova.
Maqala avtory álem meiirimdi adamdarǵa toly ekenin aitady.
«Mundai qiyn ýaqytta ózgelerge kómektesetin jannyń bar ekendigi kóńil qýantady. Almas Bolatuly, baqytty bolyńyz», - dep alǵysyn bildirdi A.Darinova.
Áleýmettik jeli paidalanýshylary politsiia qyzmetkerine karantin kezindegi kómegi men adal jumysy úshin alǵys bildirdi. Elordalyq politsiia departamentiniń baspasóz qyzmeti habarlaǵandai, aǵa leitenant Almas Ahmetov 2015 jyldan beri politsiia qyzmetkeri. Sondai-aq, ol jaýapty jáne áriptesterine syily qyzmetker.
«Qazirgi qiyn ýaqytta, karantin kezinde biz politsiia qyzmetkerleri retinde adal jumys istep qana qoimai, qiyndyqqa tap bolǵan azamattarǵa kómektesýimiz kerek. Sondyqtan kómekke zárý adamǵa jedel kómek kórsettim», – deidi Almas Ahmetov.
