Foto: Tengrinews.kz/Turar Qazanǵapov
Nur-Sultanda Qazaqstan men Ortalyq Aziiadaǵy eń úlken meshittiń saltanatty ashylýy ótti, - dep habarlaidy Tengrinews.kz agenttigi.
Jańa meshit Qabanbai batyr dańǵyly men Máńgilik El arasyndaǵy aýmaqta, Hýsein ben Talal kóshesi mańynda ornalasqan.
Kók tústi bas kúmbezdiń biiktigi 83,2 metrge jýyq, diametri 62 metr bolady.
Hill International kompaniiasynyń menedjeri Aleksandr Artemenko meshittegi kúmbez qurylym túri boiynsha álemdegi eń úlken kúmbez ekenin aitty.
Tórt munara biiktigi - 130 metr. Ár munara bes bólikten turady, olar islamnyń bes tiregi - iman, namaz, oraza, zeket jáne qajylyqty beineleidi. Sol qanattaǵy bir munara kelýshilerge ashyldy. Qonaqtar liftpen kóterilip, kórinisti tamashalai alady.
Meshittiń kireberis esigi álemdegi eń biik aǵash esikterdiń biri sanalady. Ol tropikalyq Afrikada ósetin iroko qatty aǵashynan qolmen jasalǵan. Onyń biiktigi - 12,4 metr, salmaǵy - bir jarym tonna. Esikteri qazaqy órnektermen bezendirilgen. Al syrtqy qabyrǵalarynda kógildir fonǵa aq arab órme jazýy jazylǵan.
Meshittiń qabyrǵalary men kúmbeziniń ishi túrli-tústi oiýlar, órnekter, Quran aiattary jáne duǵalarmen bezendirilgen. Biraq, negizinen, qazaq órnekteri salynǵan.
Arab kalligrafiiasyn qazaq sheberi Asylbek Baizaquly jazǵan.
Meshittiń ishki esikteriniń biiktigi - 12 metr, terezeleri túrli-tústi oiý-órnektermen bezenderilgen áinekten jasalǵan.
Qubyla jaqtaǵy qabyrǵada Allanyń 99 esimi qashalǵan. Mozaika qabyrǵanyń uzyndyǵy - 100 metr, biiktigi - 22,4 metr. Mozaika túrli tústi 25 million áinekten quralǵan.
Úlken zal men áielder namaz oqityn jer tolyǵymen qazaqy oiý-órnektermen kómkerilgen. Kilemniń jalpy aýdany 15 525 sharshy metr. Bul - álemdegi qoldan jasalǵan eń úlken kilem. Kilemniń qalyńdyǵy - 15 millimetr. Ol Jańa Zelandiiada 100 paiyz júnnen toqylǵan.
Meshittiń ashylý saltanatyna Qazaqstannyń Tuńǵysh Prezidenti Nursultan Nazarbaev qatysty.
"Búgin qasietti jumada elordamyzda keremet meshitti ashyp jatyrmyz. Bul barsha musylman turǵyndarymyz úshin mańyzdy oqiǵa. (...) Táýelsizdik alǵannan beri elimizdiń barlyq aimaǵynda meshitter ashylyp jatyr. Alla Taǵala osy meshitterde oqylǵan duǵalardy qabyl etsin. 2019 jyldyń naýryzynda Memleket basshysy retindegi ókiletimdi toqtatpas buryn osy meshittiń alǵashqy kirpishin qalaǵan bolatynmyn... Táýelsiz memleketimizdiń kórkeie berýin tileimiz. Bul musylmandyq paryz, Otan aldyndaǵy perzenttik paryz edi. Jańa Táýelsiz Qazaqstandy qurý jolyndaǵy eńbegimdi Alla jarylqady dep oilaimyn", - dedi Nazarbaev.
Meshit ornalasqan jer teliminiń aýdany 10 gektardy quraidy. Jalpy aýdany 68 062 sharshy metrge jetedi. Ǵimarattyń ainalasynda úlken saiabaq bar.
Sonymen qatar, meshittiń jerasty qabatynda 440 orynǵa arnalǵan banket zaly, 405 orynǵa arnalǵan jabyq avtoturaq, vestibiýl, dárethana, tehnikalyq jáne dini qyzmet kórsetetin oryn, qurbandyq shalatyn oryn jáne basqa da úi-jailar bar.
Birinshi jáne ekinshi qabattarda namaz oqityn orynnan bólek oqý synyptary, májilis zaly, neke zaly, Quran oqý zaly, telestýdiia, keńseler, qyzmettik bólmeler, dúkender, mýzei jáne tehnikalyq bólmeler bar.
Meshittiń jalpy syiymdylyǵy 235 000 adamdy quraidy, iaǵni osynsha adam qatarǵa turyp, bir ýaqytta namaz oqi alady.
Ǵimarattyń ashyq alańynda shamamen 200 000 adam jaiǵasa alady. Zaldarda bir mezgilde 30 000 er adam men 5 000 áiel namaz oqi alady.
Meshittiń syiymdylyǵy boiynsha Nur-Sultan qalasyndaǵy respýblikalyq bas meshit álemdegi eń úlken 10 meshittiń qataryna kiredi.
Onyń ashylýyna premer-ministrdiń orynbasary Eraly Toǵjanov, burynǵy premer-ministr Asqar Mamin, Jambyl oblysynyń eks-ákimi Berdibek Saparbaev, Almaty oblysynyń burynǵy ákimi Amandyq Batalov, eks-depýtat Qýanysh Sultanov, BI-Group holdingi basshysy Aidyn Rahymbaev jáne basqa da tanymal tulǵalar qatysty.
