Elordanyń bas sanitar dárigeri Sarhat Beisenova qala turǵyndaryn koronavirýstyń aldyn alý sharalaryn saqtaýǵa shaqyrdy, dep habarlaidy QazAqparat.
«Ókinishke qarai, kóp adamdar qaýipsizdik sharalaryn tiisti deńgeide saqtai bermeidi. Eskertý men jazalaý sharalaryna qaramastan, keibir elordalyq mekemeler sanitarlyq normalar men karantin talaptaryn eskermeidi, keibir kásipkerlik nysandary jasyryn jumys isteýdi jalǵastyryp jatyr», - dedi Beisenova elorda ákimdiginde ótken brifingte.
Spikerdiń aitýynsha, biylǵy 20 mamyrdan bastap monitoring toptary 7215 nysandy tekserdi, 251 nysanda karantin rejimin buzý faktileri anyqtaldy, onyń ishinde qoǵamdyq tamaqtaný nysandary kóp.
«Ashyq jobasy engizilgen sátten bastap qatysýshy nysandarda úi karantinin buzǵan 8518 kelýshi anyqtaldy. Onyń ishinde 5065 adam «qyzyl» mártebemen, 3453 adam «sary» mártebemen kirýge tyrysqan. Onyń ishinde, 11 maýsym men 3 tamyz aralyǵynda úi karantinin buzǵan 4847 kelýshi anyqtaldy», - dep atap ótti spiker.
Sonymen birge, úi karantinin buzǵan «qyzyl» mártebesi bar kelýshilerge qatysty QR ÁQBtK 425-babynyń 1-bóligi boiynsha 32 hattama jasaldy jáne «sary» mártebesi bar adamdarǵa sanitariialyq-epidemiiaǵa qarsy (profilaktikalyq) is-sharalar júrgizý týraly 99 qaýly berildi.
«Iaǵni, eger karantindegi naýqas adam sanitarlyq-epidemiologiialyq talaptardy saqtamasa, ózin-ózi oqshaýlaý rejimin buzsa jáne ainalasyndaǵylarǵa qasaqana juqtyrý qaýpin týdyrsa, zańǵa sáikes oǵan 30 AEK nemese 87 510 teńge mólsherinde ákimshilik aiyppul salynady» - dep túiindedi Beisenova.
