Nur-Sultan qalasynda meditsinalyq betperdeler shyǵaratyn jańa kásiporyn ashyldy, dep habarlaidy QR Indýstriia jáne infraqurylymdyq damý ministrliginiń baspasóz qyzmeti.
Nur-Sultan qalasynda meditsinalyq betperde shyǵarýmen ainalysatyn «Bionisk-Pro» óndiris oshaǵy ashyldy. Ónerkásiptiń ashylǵanyna nebári eki apta bolsa da, osy kúnge deiin 1 millionnan astam betperde shyǵarylǵan.
Óndiris ornynyń direktory Aron Qadyrovtyń aitýynsha, ónerkásip táýligine 180 myń dana betperde shyǵara alady. Qazirgi tańda suranysqa sáikes, táýligine 80 myńnan 120 myńǵa deiin meditsinalyq betperde óndirilýde. Olar qalanyń dárihanalary men emhanalaryna jetkizedi.
«Betperde óndirisi avtomattandyrylǵan jáne jartylai avtomattandyrylǵan eki stanok arqyly júrgiziledi. Birinshi stanok úsh matany biriktirip, útiktep, úsh ret búktep, jiekterine tigis salady. Kelesi stanokta betperdeler arnaiy ólshemmen kesilip, qulaqqa taǵatyn rezeńkesi jelimdeledi. Odan keiin mamandar betperdelerdi tekserip, sanap, arnaiy qaptamalarǵa 50 danadan salyp otyrady», - delingen ministrlik aqparatynda.
Betperde óndirisine arnalǵan matalar men rezeńkeler Túrkiia men Irannan jetkiziledi. Al stanoktar Qytaidan satyp alyndy. Ónerkásip oshaǵynyń mamandary Shanhai jáne Gýanchjoý qalalaryna baryp, osy stanoktarda jumys isteýdi arnaiy úirenip keldi.
«Maskalar arnaiy sý ótkizbeitin, sapa baqylaýynan ótken matalardan jasalady jáne mindetti túrde úsh qabatty bolady. Aita ketý kerek, maqtaly, toqyma matalardan tigilgen maskalardyń qorǵanysh deńgeii tómen bolady. Jáne mundai maskalar sýlanady da, mikrob jinaidy. Sondyqtan, arnaiy spanbond, meltblaýn dep atalatyn matalardan daiyndalatyn maskalardy paidalaný kerek. Bizdiń úshqabatty maskalar osyndai matalardan tigiledi jáne 92% syrtqy kúshterden tynys alý joldaryn qorǵai alady», - deidi ónerkásip direktory.
Óndiris orny jaqynda balalarǵa arnalǵan betperdeler shyǵara bastaidy.
Sonymen qatar qoldanylǵan betperdelerdi joiý jobasy daiyndalyp jatyr.
Óndiris kólemin ulǵaitý úshin FFP2/FFPP3/KN95 respiratorlarynyń qosymsha jelilerin jetkizýge kelisimsharttar jasaldy.
