Qazaqstan astanasy Nur-Sultanda Manas pen Shyńǵys Aitmatovtyń, Bishkekte Abai eskertkishteri ashylady. Bul týraly Qazaqstan men Qyrǵyztsan Prezidentteriniń birlesken málimdemesinen belgili boldy.
Atalmysh qujatta qos halyqtyń mádeni-tarihi jáne tildik ortaqtyǵyn eskerip, ǵylym, bilim berý, densaýlyq saqtaý, mádeniet, týrizm, sport jáne basqa da salalardaǵy yntymaqtastyqty odan ári damytýǵa beiildiligin rastaityndyǵy aitylǵan. Osy oraida taraptar birlesken bilim berý jáne ǵylymi-tehnikalyq baǵdarlamalardy iske asyrýdy jalǵastyrýǵa nietti ekendikterin aitty.
Qazaqstan Respýblikasy men Qyrǵyz Respýblikasynyń Táýelsizdikteriniń 30 jyldyǵyn merekeleýge orailastyrylǵan aldaǵy mereitoi is-sharalarynyń mańyzdylyǵyn atap ótedi.
Sondai-aq málimdemede taraptaryń birlesken televiziialyq jobalar, kórmeler, festivalder jáne ózge de mádeni is-sharalar ótkizý turǵysynan járdem kórsetýge, ortaq tarihi jáne mádeni murany saqtaý men ilgeriletý maqsatynda kúsh-jiger biriktirýge ázirligi sóz boldy.
«Jýyq arada Abai Qunanbaevtyń Bishkekte, sondai-aq, Manas pen Shyńǵys Aitmatovtyń Nur-Sultanda eskertkishterin ornatý týraly ýaǵdalastyqtardyń erekshe mánge ie ekenin airyqsha belgilep ótedi.
Bul máselege qatysy Qazaqstan Prezidenti Qasym-Jomart Toqaev jýrnalistermen bolǵan baspasóz máslihatynda: «Qazaqstan men Qyrǵyzstannyń mádeni kúnderin ótkizýge ýaǵdalastyq. Bishkekte Abaiǵa, Nur-Sultan qalasynda Manas pen Shyńǵys Aitmatovqa arnalǵan eskertkishter boi kóteredi. Oǵan qosa biregei tarihi muralarymyzdy dáripteý úshin kúsh-jigerimizdi jumyldyratyn boldyq», – dedi.
Taraptar tabysty kelissózder men sapar barysynda qol qoiylǵan ekijaqty qujattar Qazaqstan Respýblikasy men Qyrǵyz Respýblikasy arasyndaǵy dostyq jáne odaqtastyq qatynastardy odan ári nyǵaitýǵa yqpal etetinin, sondai-aq, qol jetkizilgen ýaǵdalastyqtardy oidaǵydai iske asyrýǵa erekshe mán beredi»,-delingen habarlamada.
