Elordanyń qoǵamdyq densaýlyq saqtaý basqarmasynyń basshysy Sáýle Qisyqova koronavirýs anyqtalǵan taǵy úsh naýqas týraly aityp berdi, dep habarlaidy Sputnik Qazaqstan.
Onyń aitýynsha, 21 naýryzda keshke qarai bir adamnan koronavirýs tabylǵan. Ol osy indetke shaldyqqan áielmen jaqyn bailanysta bolǵan.
"Al 22 naýryzda taǵy eki naýqas tirkeldi. Birinshisi - Qazaqstan azamaty. Ol statsionarda boksta koronavirýsy bar degen kúdikpen jatqan. Diagnoz rastaldy. Qazirgi kezde onyń dene qyzýy joq, biraq jaǵdaiy aýyr. Eki jaqty pnevmoniiasy bar, tynys alýy qiyndap otyr. Konsiliým belgilendi", - dedi Qisyqova onlain brifingte.
Al úshinshi naýqas - elshilik qyzmetkeri. Ol koronavirýstyń qaýpi joǵary memleketten kelgen. Baqylaý sharalary kezinde koronavirýs anyqtaldy.
Qazirgi tańda Qazaqstanda koronavirýs juqtyrǵandar sany 56 adamǵa jetti.
Sońǵy derekter boiynsha Nur-Sultanda – 31, Almatyda – 22, Qaraǵandyda - 2, Almaty oblysynda bir adam tirkeldi.
