Elordadaǵy Jekpe-jek saraiynda kibersporttan «World Electronic Sports Games - 2019: Kazakhstan» iri týrniri ótti, dep habarlaidy "Ult aqparat" Qazaqstan QCF kibersport federatsiiasynyń baspasóz qyzmetine silteme jasap.
Sportshylar tórt distsiplina - «Counter-Strike: Global Offensive», «Dota 2», «StarCraft II» jáne «Pro Evolution Soccer 2020» boiynsha baq synady. Týrnirdi tamashalaý úshin eki myńnan astam kórermen jinaldy. Ol bas seriktes «Samruq Qazyna» AQ-nyń, QR Mádeniet jáne sport ministrliginiń, Nur-Sultan qalasy ákimdiginiń, «Qazaqtelekom» AQ men QR Jaýyngerlik óner qaýymdastyǵynyń qoldaýymen ótti.
«Qazirgi tańda kibersport damyp keledi. Sportshylardyń jasy 14 pen 25 aralyǵyn quraidy. Búginde milliondaǵan kórermen kibersportqa qoldaý kórsetip otyr. Bul – álemdik trend. Sizderdi osyndai aitýly oqiǵamen quttyqtap, sáttilik tilegim keledi. Mereke qutty bolsyn!», - dedi WESG-2019 qatysýshylaryna elorda ákimi Altai Kólginov.
Qazaqstan kibersport federatsiiasynyń prezidenti Qýanyshbek Esekeev kórermenderge erekshe belsendilik pen qyzyǵýshylyq tanytqandary úshin alǵys bildirdi.
«WESG-2019: Kazakhstan» týrniriniń ulttyq kezeńininiń jeńimpazdary qarasha aiynda Almatyda ótetin World Electronic Sports Games Ortalyq Aziia týrnirinde Qazaqstan namysyn qorǵaidy. Ortalyq Aziia kezeńinen keiin qatysýshylar Qytaida ótetin kibersport boiynsha WESG-2020 halyqaralyq chempionatynda synǵa túsedi. Atalmysh týrnir Alibaba korporatsiiasynyń sporttyq bólimshesi bolyp tabylatyn Alisports kompaniiasy uiymdastyrǵan jahandyq kibersporttaǵy asa mańyzdy ári iri sharalardyń biri ekenin atap ketý kerek.
