Nur-Sultanda «Qazaqstannyń úzdik taýary» jyl saiynǵy óńirlik irikteý baiqaý-kórmesi ótti, dep habarlaidy "Ult aqparat" elorda ákimdiginiń baspasóz qyzmetine silteme jasap.
Eksporttyq komissiia óńirlik týr barysynda elordada óndiriletin úzdik taýarlardy úsh nominatsiia: «Óndiristik baǵyttaǵy úzdik taýar», «Halyqqa arnalǵan úzdik taýar», «Úzdik azyq-túlik taýarlary» boiynsha anyqtady. Saltanatty sharada Nur-Sultan qalasy ákiminiń orynbasary Baqtiiar Máken konkýrstyń otandyq óndiris taýarlaryn, sondai-aq shaǵyn jáne orta biznesti damytýda mańyzdylyǵyn atap ótti.
«Biz óz eńbegimen biznesti damytyp jatqan adamdardy kórip, qýanyp otyrmyz. Bul asa mańyzdy, sebebi bizdiń qalamyz da kórkeiip, damyp jatyr. Qala basshylyǵy bizdiń taýar óndirýshilerimizdiń deńgeiin arttyrýǵa basa nazar aýdaryp otyr. Barlyq qatysýshylarǵa, uiymdastyrýshylar men qala turǵyndaryna qatysqandary úshin alǵys aitamyn. Qalalyq ákimdiktiń atynan jeńimpazdardy quttyqtap, tolaǵai tabystar tileimin!», - dedi Baqtiiar Máken.
Nur-Sultan qalasy kásipkerler palatasynyń direktory Almat Júnisov biyl konkýrs-kórmege qatysýshylar sanynyń rekordtyq deńgeige jetkenin atap ótti.
«Osy joly kórme-baiqaýǵa 100-den astam astanalyq kompaniia qatysty, onyń 70% – jańa qatysýshylar! Baiqaýǵa telekommýnikatsiialyq jabdyqtar, avtomobil jáne vagon tarazylary, qurǵaq qurylys qosyndylaryn, sporttyq taǵamdar men qolóner irimshikterin, sondai-aq tis pastasy, balalar kiimderi men oiynshyqtary, daiyn taǵamdar men konditerlik ónim óndirýshileri qatysyp jatyr. Bul baiqaý-kórmeni Nur-Sultan qalasy kásipkerler palatasy uiymdastyryp otyr», - dedi Almat Júnisov.
Konkýrsta tómendegi kompaniialar jeńimpaz atandy: «ZGM «Penetron-Kazahstan» JShS, «Tselingidromash» JShS, «Kompaniia «VELS» JShS, «DANMARD» JShS, «Qazaq oiýlary» JShS, «Digital System Servis» JShS, «Kazak House» JK, «Golden Rill Group» JShS, «Alaý TM» JShS.
