«Elordalyq elektrondy mektep» platformasy jasaldy. Bul týraly Nur-Sultan qalalyq bilim basqarmasynyń basshysy Sholpan Qadyrova aitty, dep habarlaidy QazAqparat.
«Budan buryn da aitqanymyzdai, oqý úderisi qashyqtyqtan jumys rejiminde sanitarlyq-epidemiologiialyq erejeler men oqý ýaqytyn utymdy paidalaný normalarynyń talaptaryn eskere otyryp, sinhrondy jáne asinhrondy formatta júzege asyrylýy múmkin. Sabaqtyń asinhrondy formaty internet-platformalardyń múmkindikteri arqyly muǵalimniń bilim alýshylarmen ózara árekettesýin, sonyń ishinde oqýshylar ózindik jumysy úshin muǵalimnen keri bailanys alyp otyrady. Muǵalim sabaqqa arnalǵan oqý tapsyrmalaryn internet-platformalardyń mazmuny men múmkindikterin eskere otyryp jasaidy. Buǵan elektrondy oqýlyqtar, beinematerialdar, sheberlikke baýlý trenajerleri, bilimdi baqylaý resýrstary jáne basqalaryn qosa sandyq bilim berý resýrstary kiredi», - dedi ol elorda ákimdiginde ótken baspasóz máslihatynda.
Buǵan qosa onyń aitýynsha, «Elordalyq elektrondy mektep» elektrondyq platformasy jasaldy.
«Onda barlyq deńgeilerge arnalǵan beine sabaqtar, qysqa merzimdi sabaq josparlary, bilim berýdiń sandyq qorlary jáne taǵy basqaralary ornalastyrylǵan. Júielik-ádistemelik keshenge bilim berýdiń barlyq deńgeiiniń muǵalimderi úshin aqysyz ári qol jetimdilik bolady», - dedi Sholpan Qadyrova.
