Nur-Sultanda eki ekologiialyq saiabaq salynady. Bul týraly Nur-Sultan qalalyq sáýlet, qala qurylysy jáne jer qatynastary basqarmasy habarlady. Sonyń biri Taldykól kóliniń janynda bolady. Josparlanǵan aýmaq qalanyń ońtústik-batys bóliginde ornalasqan. Onyń aýmaǵy - 5700 gektar.
Sondai-aq aýmaq boiynda bolashaq biologtar men ornitologtar úshin kórý alańdary men ekskliýzivti bilim berý ortalyqtaryn salý josparlanýda. Osylaisha, infraqurylymdy qurý kezinde Taldykól saiabaǵy ekologiialyq týrizmdi damytý ortalyǵyna ainalýy múmkin.
«Astana bas jospary» ǴZJI» JShS qyzmetkerleri Qazaqstannyń bioalýantúrliligin saqtaý qaýymdastyǵymen birge Ulybritaniiadaǵy áriptesterimen birlese otyryp Londonnyń batpaqty sý aidyny ortalyǵy, Rainham Marshes tabiǵi parki, Shervýd ormany, Minsmere Reserve qoryǵy úlgisinde tabiǵi saiabaqtardy jobalaý men salýdaǵy halyqaralyq tájiribeni zerttep, jetekshi ornitolog mamandarmen kezdesýler ótkizdi.
Tabiǵi saiabaqtyń qurylýy Qyzyl kitapqa engen janýarlar men sirek kezdesetin qustardyń tabiǵi ortasyn saqtaýǵa múmkindik beredi.
Taldykól – tarihi mańyzy zor ornitologiialyq aimaq. Maýsymdyq qonys aýdarý kezeńinde kólde jáne oǵan jaqyn jerlerde qustardyń 200-ge jýyq túrlerin kórýge bolady. Olardyń arasynda pelikan, aq quiryq, suńqyldaq aqqý, aq quiryqty búrkit bar. Botanikalyq zertteýler nátijesinde kólderge irgeles jerlerde 98 ósimdik túri tirkeldi.
Maibalyq kólindegi ekinshi ekopark te sol siiaqty tartymdy oryn bolmaq (áýejai baǵytynyń ońtústik-shyǵys jaǵy). Onyń jalpy aýdany – 400 gektar, sý qoimalary – 120 gektar. Saiabaq kesheninde balyq aýlaýǵa arnalǵan jasandy sý qoimalary, erekshe qorǵalatyn jaǵalaý aimaqtary, serýendeý jáne velosiped joldary, sporttyń belsendi túrleri úshin aimaqtar jáne aýmaqtyń biregei ekojúiesin saqtaýǵa arnalǵan alańdar qurý qarastyrylǵan.
Týristerdi janýarlar dúniesiniń alýan túrimen tanystyrýǵa arnalǵan ekologiialyq marshrýttar men soqpaqtar jasaý josparlanýda.
Maibalyq kólinen shyǵysqa qarai ornalasqan aýmaqta týrister men qala turǵyndary úshin tartymdy zamanaýi tabiǵi aimaq uiymdastyrýdyń áleýeti joǵary. Usynylyp otyrǵan aimaq barlyq tabiǵi erekshelikterdi – klimatty, florany, faýnany eskere otyryp, ekologiialyq park qurýǵa qolaily. Bul territoriiada ósimdikterdiń 100-ge jýyq túri ósedi, qustardyń 200-den astam túri tirshilik etedi. Onyń ishinde uia salatyn jáne jyl qustary, sútqorektilerdiń 30-dan astam túri bar. Bul aýdanda balyq ósirý josparlanyp otyr. Saiabaqta balyq meiramhanasy jumys isteidi.
Saiabaqtyń ereksheligi – munda mekendeitin janýarlar men qustardyń erkin jaǵdaida jáne jergilikti tabiǵat zonasyna tán bolýy.
At sporty klýbyn ashý josparlanýda. Bul degenimiz, saiabaq aýmaǵyn at ústinde aralaýǵa bolady. Maibalyq kóliniń aýmaǵy erekshe qorǵalatyn aimaq bolady. Odan shyǵatyn arnalar «tiri arteriialar» siiaqty barlyq azamattarǵa kólge emin-erkin jetýge múmkindik beredi. Bolashaqta orman saiabaǵy qarqyndy damyp kele jatqan qalanyń jasyl ortalyǵyna ainalady. Bul elordanyń jasyl kapital ideiasyn jalǵastyrý úshin mańyzdy qadam.
Qazaqstandyq bioalýantúrlilik qaýymdastyǵy jobaǵa saraptamalyq qoldaý kórsetedi. Qajet bolsa, sheteldik mamandar tartylady. Qaýymdastyq pen RSPB qyzmetkerleri biologiialyq jáne landshafttyq ártúrlilikti túgendeýge baǵyttalǵan birqatar ǵylymi zertteýler júrgizedi. Olardyń jumysynyń nátijeleri ekologiialyq parkti qurýdyń kelesi kezeńderine negiz bolady.
«Búginde qala «Nur-Sultan – jaily qala» bas jospary aiasynda damyp keledi. Osy qujattyń mindetteriniń biri – elorda turǵyndary men qonaqtarynyń jailylyǵy úshin tartymdy ortalyqtar quryp, ishki týrizmdi damytý. Osyndai eko-parkter Nur-Sultannyń jasyl beldeýin qalyptastyrý jobasyna sáikes keledi jáne demalýshylardyń súiikti ornyna ainalýy múmkin. Jobanyń tujyrymdamasy – barlyq bioalýantúrlilik pen tabiǵi kórinistermen belgili bir qorǵalatyn aýmaq qurý. Ekologiialyq týrizmdi at marshrýttaryn qura otyryp damytý josparlanýda. Osy maqsatta saiabaqtyń qonaqtary úshin arnaiy soqpaqtar jasalady», - deidi sáýlet, qala qurylysy jáne jer qatynastary basqarmasynyń basshysy Nurlan Ýranhaev.
