Nur-Sultanda burynǵy áieline shabýyl jasaǵan er adam izdestirilip jatyr. Bul týraly Nur-Sultan qalalyq Politsiia departamentiniń baspasóz qyzmeti habarlady, - dep habarlaidy Tengrinews.kz tilshisi.
Buǵan deiin áleýmettik jelide áieldiń soqqyǵa jyǵylǵan sáti túsirilgen kadrlar taraǵan bolatyn. Jazbada "áieldi toǵyz ai boiy artynan qalmaǵan burynǵy kúieýi anasynyń kózinshe uryp-soqqany" jazylǵan.
Politsiia videoǵa qatysty pikir bildirdi.
"Áleýmettik jelilerde júrgizilgen monitoring kezinde er adamnyń áieldi uryp-soǵyp jatqany túsirilgen video anyqtaldy. Politseiler 13 sáýirde saǵat 7.50-de elordanyń 25 jastaǵy turǵyny Syǵanaq kóshesinde óziniń burynǵy áielin uryp-soqqanyn anyqtady. Derek Esil aýdandyq politsiia bóliminde tirkeldi, er adamnyń júrgen jerin anyqtaý sharalary júrgizilip jatyr", - delingen habarlamada.
Tártip saqshylarynyń aitýynsha, jábirlenýshi buǵan deiin politsiiaǵa eki ret aryz bergen.
"Turmystyq zorlyq-zombylyq profilaktikasy týraly" zańnyń 20-babyna sáikes kinálige qatysty qorǵaý nusqamalary shyǵaryldy, ol turmystyq zorlyq-zombylyq jasaýǵa, qýdalaýǵa jáne ózge de tásildermen bailanysqa túsýge tyiym salýdy kózdeidi. Er adamǵa QIJK-niń 461-babynda kózdelgen "Qorǵaý tártibin buzý" zańy túsindirildi. Alaida ol qorytyndy shyǵarmai, isin jalǵastyra bergen", - dedi politsiia ókilderi.
Politsiia departamenti málimetinshe, 2022 jyldyń naýryzynda da er adam eki ret sot qaýlysymen quqyqbuzýshylyq jasaǵany úshin kináli dep tanylǵan, sot eskertý túrindegi ákimshilik jaza qoldanǵan.
