Kóliktik baqylaý inspektsiiasy basshysynyń laýazymy atalǵan inspektsiianyń bas mamany laýazymyna deiin tómendetildi. Bul týraly «ANTIKOR ORTALYGY» alańynda ótken brifing barysynda QR Sybailas jemqorlyqqa qarsy is-qimyl agenttiginiń Nur-Sultan qalalyq departamenti basshysynyń birinshi orynbasary Jazira Jylqyshieva aitty, dep habarlaidy "Ult aqparat".
Nur-Sultan qalalyq sybailas jemqorlyqqa qarsy is-qimyl agenttiginiń Indýstriia jáne infraqurylymdyq damý ministrligi atyna QR Qylmystyq is júrgizý kodeksiniń 200 babyna sáikes jibergen usynysyna sáikes, QR IIDM jaýapty hatshysynyń buiryǵymen 1 maýsymda Kóliktik baqylaý inspektsiiasynyń basshysy Meiram Qońyrqazov inspektsiianyń bas mamany laýazymyna deiin tómendetildi. Memlekettik qyzmet týraly zańnamaǵa engizilgen ózgertýlerge sáikes, qaramaǵandaǵy qyzmetkeri jemqorlyq qylmys jasaǵan kezde vedomstvonyń basshysy jaýapkershilikke tartylýy tiis.
«Buǵan deiin Nur-Sultan qalalyq sybailas jemqorlyqqa qarsy qyzmet inspektsiianyń avtomobil kóligindegi baqylaý bólimi bas mamany Samat Aidarkenovke qatysty iri gabaritti tasymal sýbektilerinen jalpy qamqorlyǵy jáne quqyq buzýshylyqtar anyqtalǵan jaǵdaida ákimshilik jaýapkershilikke tartpaý úshin birneshe ret para alýǵa qatysty qylmystyq isti aiaqtaǵan bolatyn», - dedi Jazira Jylqyshieva.
Onyń atap ótýinshe, sot barysynda Samat Aidarkenov birneshe márte para alǵanyn tolyq moiyndap, oǵan 26 mln 250 myń teńge kóleminde aiyppul salynǵan.
Sonymen qatar ol memlekettik qyzmette laýazym atqarý quqyǵynan aiyrylǵan.
