QR Prezidenti Qasym-Jomart Toqaevtyń jarlyǵyna sáikes elordada áskeri mindettiler tizimi qurylyp, áskerge shaqyryldy. Búgin elorda ákimi Altai Kólginov pen Qorǵanys ministriniń birinshi orynbasary - QR QK Bas shtabynyń bastyǵy Murat Bektanov áskeri mindetti-eriktilermen kezdesti, - dep habarlandy qala ákiminiń resmi saitynda.
Birinshi kezeńde 100 áskeri mindetti shaqyryldy. Olardyń barlyǵy - áskeri mindetti volonterler. Qajet bolǵan jaǵdaida olardyń sany ulǵaitylady. Áskeri mindettiler qatarynda-belgili qazaqstandyq boksshy, «Kók týdyń jelbiregeni» ániniń avtory jáne oryndaýshysy Ibragim Eskendir de bar.
«Halyq árqashan shyǵarmashylyq adamdaryn, sportshylardy qoldaidy. Biz bul qoldaýdy sezinemiz. Halqyma qyzmet etýge daiynmyn. Men zapastaǵy leitenantpyn, bokspen ainalysatyndyqtan fizikalyq turǵyda tózimdimin. Memleket basshysynyń áskeri mindettilerdi arnaýly áskeri jiynǵa shaqyrý týraly Jarlyǵyn estigende esh kúmánsiz birden elordadaǵy áskeri komissariatqa keldim. Meditsinalyq tekserýden óttim, qyzmetke daiynmyn», - deidi Ibragim Eskendir.
Qala ákimi Altai Kólginov atap ótkendei, áskeri mindettilerdiń negizgi mindetteri -koronavirýstyq infektsiianyń taralýyna jol bermeý jónindegi jedel shtab jumysyna qatysý, ótkizý-baqylaý beketterinde qyzmet atqarý, qala aýmaǵyna dezinfektsiia júrgizý, infektsiia oshaqtary anyqtalǵan nysandardy kúzetý.
Áskeri mindettiler tamaqpen, kiim-keshekpen, sondai-aq eńbekaqymen tolyqtai qamtamasyz etildi.
