Mańǵystaý oblysynda taǵamnan ýlanǵan 9 jastaǵy bala qaitys boldy. Densaýlyq saqtaý ministrliginiń málimetinshe, dárigerler balada taǵamdyq botýlizm bolýy múmkin dep kúdiktengen, dep habarlaidy ult.kz.
2016 jyly týǵan bala 19 qyrkúiekte Munaily aýdandyq aýrýhanasyna túsken. Sol kúni jaǵdaiynyń aýyrlyǵyna bailanysty oblystyq balalar aýrýhanasynyń jansaqtaý bólimine aýystyrylǵan.
Balaǵa botýlizmge qarsy sarysý engizilip, jasandy tynys alý apparatyna qosylǵan. Emge respýblikalyq deńgeidegi mamandar da tartylǵan. Alaida aýrýdyń aýyr aǵymynan mi isinip, poliorgandyq jetkiliksizdik damyp, bala III dárejeli komaǵa túsken.
6 qazanda balanyń qaitys bolǵany tirkeldi.
Qazir onyń otbasynyń taǵy úsh múshesi aýrýhanada em alyp jatyr. Ákesiniń jaǵdaiy jaqsarǵan, qalǵan eki eresek adam dárigerler baqylaýynda.
Densaýlyq saqtaý ministrligi botýlizmniń ómirge qaýip tóndiretin aýyr infektsiia ekenin eskertti. Aýrýdyń negizgi kózi durys daiyndalmaǵan nemese saqtalmaǵan úi konservileri, keptirilgen jáne ystalǵan balyq pen et ónimderi bolýy múmkin.
Mamandar qaqpaǵy isingen, iisi nemese túri ózgergen, sondai-aq ruqsat etilmegen jerlerden satyp alynǵan ónimderdi tutynbaýǵa shaqyrdy.
