Ministrlikter úiindegi buzaqylyǵy úshin alty áiel 70 myń teńgeden astam aiyppul tóleidi. Bul týraly Nur-Sultan politsiia departamentiniń baspasóz qyzmeti habarlady.
Politsiianyń aqparatynsha, 19 shildede ashýly áielder ministrlikter úiiniń ǵimaratyna basa-kóktep kirmek boldy.
Olar tártip saqshylaryna til tigizip, qol-aiaǵymen uryp, densaýlyq saqtaý ministrliginiń qyzmetkerleri men kúzetshilerge sý shashqan.
"Ministrliktiń jaýapty qyzmetkerleri dialog quryp, problemalaryn túsinip, onyń sheshimin tabýǵa tyrysqanda, áielder olarǵa balaǵat sózder aityp, judyryq ala júgirgen, betterinen uryp, kiimin tartyp julqylaǵan", - dep málimdedi departamenttegiler.
Buzaqylyq áreketteri úshin alty áiel ákimshilik jaýapqa tartyldy: olardyń árbirine 25 AEK (72 925 teńge) aiyppul salyndy. Politsiia narazy áielder ministrlikke qandai talappen kelgenin naqtylaǵan joq.
