Nur-Sultan qalasynyń Kóktal shaǵyn aýdanynyń Bolashaq kóshesinde jastar tóbelesip, saldarynan 17 jastaǵy bozbala kóz jumdy, dep habarlaidy "Ult aqparat" qalalyq politsiia departamentiniń baspasóz qyzmetine silteme jasap.
Oqiǵanyń bolǵany týraly habarlama 102 nómirine 10 qarasha túngi saǵat 22.56 kezinde túsken. Politsiia qyzmetkerleri kelgende bir top jastardyń arasynda týyndaǵan janjal tóbeleske ulasyp, 2 adam dene jaraqatyn alǵan.
«Eki adam dene jaraqatyn alǵan. Olardyń biri 17 jastaǵy J.Aǵadil pyshaq jaraqatyn alyp, jedel járdem kelgenshe kóz jumǵan. Qazir osy oqiǵa boiynsha Qazaqstan Respýblikasynyń Qylmystyq kodeksiniń 99-baby 2-bóligi men 293-baby 3-bóligi boiynsha qylmystyq is qozǵaldy. Tóbeleske qatysqandardyń barlyǵyn anyqtaý jumystary júrgizilýde. Ustalǵandar tergelip jatyr», - dedi departamentten.
Eske salaiyq, biyl aqpanda qoǵam belsendisi Dýlat Aǵadildiń tergeý izoliatorynda qaitys bolǵany habarlanǵan edi. Ol sotqa qurmetsizdik tanytty jáne sýdiaǵa balaǵat sózder aitty degen aiyppen qylmystyq jaýapkershilikke tartylǵan bolatyn. Keiin prokýratýradaǵylar Aǵadildiń ólimine oǵan qoiylǵan asqynǵan miokard infarkty diagnozy sebep bolǵanyn jáne onyń mas bolǵanyn málimdedi.
