Nur-Sultanda az qamtylǵan otbasylarǵa 616 páter satyp alýǵa 5,1 mlrd teńge bólindi. Bul týraly búgin Nur-Sultan qalalyq strategiialyq jáne biýdjettik josparlaý basqarmasy basshysynyń mindetin atqarýshy Aijan Túgelbaeva aitty, dep habarlaidy QazAqparat tilshisi.
«Respýblikalyq biýdjetti naqtylaý barysynda Nur-Sultan qalasyna 30 mlrd 768 mln teńge transfert qarastyrylǵan. Onyń 16 mlrd 95,8 mln teńgesi investitsiialyq jobalardy júzege asyrýǵa qarastyrylyp otyr», - dedi ol.
Aijan Túgelbaevanyń atap ótýinshe, Eńbek jáne halyqty áleýmettik qorǵaý ministrligi tarapynan ataýly áleýmettik kómek kólemi arttyrylǵan.
«Bul maqsatqa 942,6 mln teńge somasynda aǵymdyq transfert bólindi. Biýdjet salasynyń tómen jalaqy alatyn qyzmetkerleriniń ailyǵyn 30 paiyzǵa kóterýge 4,4 mlrd teńge somasynda aǵymdyq transfert kózdelip otyr. Halyqtyń az qamtylǵan tobyna 50 sharshy metrden kem emes 616 páter satyp alýǵa 5,1 mlrd teńge bólindi. Jer ýchaskelerin memleket qajettiligine alýǵa 3,8 mlrd teńge qarastyrylǵan», - dedi basqarma basshysynyń mindetin atqarýshy.
Sonymen qatar A.Túgelbaeva qala biýdjetiniń jekelegen baǵdarlamalaryna kózdelgen qarajattardyń ońtailandyrylǵandyǵyn da aitty.
«Jekelegen biýdjettik baǵdarlamalar boiynsha 10 mlrd 956 mln teńge ońtailandyryldy. Atalǵan qarajatty birqatar shuǵyl mindetterdi sheshýge baǵyttaý kózdelip otyr», - dedi ol.
Sondai-aq, ol Nur-Sultan ákimdigi oiyn-saýyq sharalaryna arnalǵan shyǵystaryn 1 mlrd teńgege qysqartqanyn aitty.
«Mádeniet jáne sport basqarmasyna qosymsha 110,9 mln teńge qarastyrylǵan. Onyń ishinde 33,5 mlrd teńge tarihi-mádeni muralardyń saqtalýyn qamtamasyz etýge, eskertkishterdi aǵymdyq jóndeýge jumsalady. «Teatr jáne mýzyka ónerin qoldaý» 008 baǵdarlamasy boiynsha 14,3 mln teńge «Memlekettik akademiialyq filarmoniia» memlekettik kommýnaldyq kásipornyna jarylǵan sý qubyryn jóndeýge beriledi. Qala kitaphanalarynyń jumys isteýin qamtamasyz etý úshin 5 mln teńge bólinedi», - dedi ol.
Aita keterligi, qalalyq mádeniet jáne sport basqarmasynyń biylǵy mádeni jáne oiyn-saýyq sharalaryn ótkizýge arnalǵan shyǵystary 1 mlrd 158,4 mln teńgege qysqaryp otyr.
