Nur-Sultanda 800-den astam otbasy apatty úilerden jańa baspanaǵa kóshiriledi. Sonymen birge 50-den astam kóppáterli turǵyn úige jóndeý jumystary júrgiziledi, dep habarlaidy "Ult aqparat".
Elorda ákimdiginen málim etkendei, apatty úilerdiń keibiri 90 jyl buryn salynǵan.
Qala ákimi Altai Kólginov eski úilerdi aralap, turǵyndarmen áńgimelesti.
Saryarqa aýdany, Besshatyr kóshesi, 8-úidiń turǵyndary byltyrǵy kúzde elorda ákimimen kezdeskennen keiin aýdanda birqatar máseleler sheshilgenin aitty. Asfalt tóselip, káriz júiesi qalpyna keltirildi.
«Úi kóz aldymyzda buzylyp jatyr. Qysta kóppáterli úidi kómirmen jylytamyz. Úi sýyq», - deidi turǵyndar.
«Qalada 125 apatty úi bar. Sizdiń aýdanda byltyr bolyp, osy jyly súriletin úilerdiń qataryna qostyq. Osy úidiń barlyq otbasylary jańa jyldy jańa baspanada qarsy alady. Biyl 800-den astam otbasyn jańa úilerge kóshiremiz», - dedi Altai Kólginov.
Altynsarin kóshesinde súriletin taǵy bir úidiń salynǵanyn 90 jyl bolǵan. Sondai-aq, dál janyna temirjoldar tóselgen barak tiptes úiler buzylady. «Vagon relsten shyǵyp, úiimizge jaqyn jerge qulaǵan jaǵdailar boldy. Balalardy dalaǵa jiberýge qorqamyz», - deidi turǵyndar.
Sonymen qatar, turǵyn úi-kommýnaldyq sharýashylyǵyn jańǵyrtý baǵdarlamasy aiasynda elordada 50-den astam kóppáterli turǵyn úi kesheni jóndeýden ótedi.
«Turǵyn úi salý — mańyzdy baǵyttardyń biri. Eger 800-den astam otbasy apatty úilerden jańa úilerge kóshetin bolsa, biyl kezekte turǵandar úshin 8 myńnan astam áleýmettik páter salynady. Biraq biraz jyl buryn ǵana salynǵan úiler boiynsha da suraqtar bar. Olardyń plitkalary qulap, fýndamentteri otyryp jatyr. Mysaly, «Infiniti», «Territoriia komforta-2», «Orbita», «7 bochek» jáne taǵy basqa turǵyn úi keshenderi. Bul úilermen de ainalysamyz. Memleket kúrdeli jóndeý jumystaryn júrgizýge qarajat bóledi, sodan keiin bul qarajat turǵyndar arasynda 15 jylǵa deiingi merzimge bólinedi», - dedi qala ákimi Altai Kólginov.
