Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qisyqovanyń aitýynsha elordada koronavirýs infektsiiasy alǵash tirkelgen sátten bastap 48 nysan karantinge jabylǵan, dep habarlaidy QazAqparat.
«Elordada koronavirýs infektsiiasynyń taralýyna jol bermeý úshin birqatar shara qabyldanyp jatyr. Sondai sharalardyń biri – meditsina qyzmetkerlerin qalanyń qonaq úilerine ornalastyrý. Qazirgi ýaqytta 692 meditsinalyq qyzmetker qonaq úilerde. Demalǵannan keiin qaitadan bári jumysqa barady», - dedi Sáýle Qisyqova «Habar 24» arnasynda onlain rejimde ótken baspasóz máslihatynda.
Basqarma basshysy keltirgen málimetke sáikes, qalada koronavirýs juqtyrǵan azamattarmen bailanysta bolǵan 4 129 adam anyqtalǵan. 309 virýs oshaǵynda dezinfektsiialyq jumystar júrgizilgen.
«Qalada koronavirýs infektsiiasy alǵash tirkelgen sátten bastap 48 nysan karantinge jabyldy. Olardyń ishinde turǵyn úi keshenderi, ákimshilik mekemeler men ózge de nysandar bar. Olardyń ishinde 26 nysanda karantin aiaqtaldy. Búgingi kúni 22 nysan áli karantinde. Karantinge jabylǵandardyń ishinde - aitýynsha «Sharapat» áleýmettik qyzmet kórsetý ortalyǵy da bar», - dedi ol.
Basqarma basshysy sonymen qatar qalanyń jekelegen bólikterinde shekteý engizý týraly qaýly shyqqanyn aityp ótti.
«Qalada 9 úi karantin qorshaýyna alyndy. Karantindik aýmaqtarda búgin áskerilermen birge 200-ge tarta adam dezinfektsiia jumystaryn júrgizdi. 2 800 úide de dezinfektsiia jasaldy. Epidemiologiialyq ahýal baqylaýda», - dep túidi Sáýle Qisyqova.
Aita ketsek, buǵan deiin Sáýle Qisyqova elordada qazirgi tańda koronavirýs infektsiiasyn juqtyrǵan 9 adam aýyr halde jatqanyn málim etken edi.
