Elordada 42,5 myń teńge kólemindegi áleýmettik kómekti 170 myńǵa jýyqtadam aldy, dep habarlaidy qala ákiminiń resmi saity.
Sait tartqan málimetterge qaraǵanda, barlyǵy 353 myń ótinim tústi.
Jumyspen qamtý jáne áleýmettik qorǵaý basqarmasynyń basshysy Sáýle Nurǵojina atap ótkendei ótinimderdiń arasynda bir adamnan birneshe ret kelgen, jii qaitalanatyndary da bar.
«Mamandar demalyssyz kúsheitilgen tártipte jumys istep jatyr. Ótinimderdi «Azamattarǵa arnalǵan úkimet« KEAQ-men jáne memlekettik áleýmettik saqtandyrý qorymen (MÁSQ) birlese otyryp qarastyryp jatyrmyz. Ýaqyttyń bir bóligi barlyq derekterdi tekserýge ketip jatyr. Qazirgi tańda jumys istep jatqan turǵyndar da ótinim berýde, olardyń ishinde eńbekaqysy 500 myń teńgeni quraityndary da bar. Keibir adamdar birneshe qaitara ret ótinim berýde.
Osynyń barlyǵy ótinimderdi tekserý ýaqytyna áser etedi. Mamandar ár ótinimdi muqiiat tekseredi. Ýaqytty únemdeý jáne ótinimderdi óńdeý jyldamdyǵyn arttyrý úshin ótinimdi tek bir ret ǵana jiberý kerek», - dedi jumyspen qamtý jáne áleýmettik qorǵaý basqarmasynyń basshysy Sáýle Nurǵojina.
Tótenshe jaǵdai kezinde qarjy kómegin buryn resmi jumys istegen adamdar ǵana emes, ózin-ózi jumyspen qamtyǵandar, bir jyldan astam ýaqyt ishinde dekrettik demalysta bolǵan áielder, stýdentter de ala alady. Ótinishti «Elektrondyq úkimet» veb-portaly, telegrambot egov.kz nemese 42500.enbek.kz saity arqyly elektrondyq formatta berýge bolady.
Qosymsha aqparat alý úshin jumyspen qamtý jáne áleýmettik qorǵaý basqarmasyna 55-14-87, 55-01-74, 55-69-59, 55-67-12, 109(iKomek) habarlasýǵa bolady.
